Амма улууһун дьокутааттарын Сэбиэтин бэрэссэдээтэлэ Владимир Колосов чэпчэтиилээх сурутуу декадатын кэмигэр түөлбэтин биэс олохтооҕор «Амма олоҕо» хаһыакка биир сылга толору сурутта. Маннык үтүө аахсыйаны улуус дьокутаата ааспыт сылга эмиэ оҥорбута.
«Мин эмиэ ааспыт сылга суруппут түөлбэм биэс оҕолоох биэс ыалыгар кэлэр 2026 сылга эмиэ толору суруттум. Манан мин Амма уонна Уус Майа улуустарын олохтоохторун интэриэстэрин өрөспүүбүлүкэ таһымыгар көмүскүүр Ил Түмэн дьокутаата, тутуу, олох-дьаҺах коммунальнай хаһаайыстыбатын уонна энергетика боппуруостарыгар сис кэмитиэтин бэрэссэдээтэлэ Александр Иванович Корякин үтүө аахсыйатын өйүүбүн. Улуус хаһыата хас нэдиэлэ аайы тахсар нүөмэригэр элбэх сонун ыстатыйалары булан ааҕабын. Кумааҕы хаһыат оруола мин саныахпар хаһан да сүтүө суоҕа. Дьиэҕэр тутан олорон, эргитэ сылдьан ааҕар үчүгэй буоллаҕа. Аҥардас социальнай ситиминэн эрэ муҥурданар табыллыбат. Хаһыат эрэдээксийэтэ телеграм каналыгар, ВК сыһыарыыга сонуннары сойуппакка таһаара турар. Ол гынан мантан сорох сонуннар тэнийэн, кэҥээн хаһыакка тахсаллар. Улууспут бары олохтоохторун хаһыаккытыгар сурутуоххут диэн эрэнэбин уонна удамыр сыанаҕа сыл устата хаһыаккытын тутан улуускут олоҕун туһунан билэ олоруҥ диэн ыҥырабын. Маннык улууспут хаһыатын өйөөн улуус, нэһилиэк депутаттарыгар барыларыгар ыҥырыы ыытабын, элбэх оҕолоох дьоҥҥутун өйөөҥҥүт улууспут хаһыатыгар суруйтарын!», — диэн Владимир Владимирович санаатын тириэртэ.
Улууспут үрдүкү бэрэстэбиитэллээх уорганын салайааччытыгар махтанабыт уонна атын улуус, нэһилиэк дьокутааттара сурутуоххут диэн эрэнэбит.
«Амма олоҕо» хаһыат