Быйылгы сыл Амма Наахара нэһилиэгэр Тыа хаһаайыстыбатын сылынан биллэриллибитэ бэйэтэ туспа суолталаах. Үлэ Дьоруойа, биллиилээх ыанньыксыт Петр Ионович Яковлев төрөөбүтэ 105 сыла. Бэлиэ датаны көрсө кини пааматынньыгар сүгүрүйүү, сылы үөрүүлээхтик аһыы буолла.
Үөрүүлээх тэрээһиҥҥэ кыттыыны улуус баһылыга Степан Кузьмин, улуус тыатын хаһаайыстыбатын управлениетын салайааччыта Ион Кононов кыттыыны ыллылар. Петр Ионович туһунан Амма Наахара нэһилиэгин баһылыга Захар Александров, улуус тыа хаһаайыстыбатын управлениетын салайааччыта Ион Кононов уонна нэһилиэк бэтэрээннэрин Сэбиэтин бэрэссэдээтэлэ Марианна Чен ахтан санаан, кини дьоруойдуу олоҕун сырдаттылар.
Кэлбит ыалдьыттар П. И. Яковлев аатынан оскуола түмэлигэр сырыттылар, түмэл баай экспонаттарын сэргии көрдүлэр, оҕолор кэпсээннэрин иһиттилэр.
Салгыы Амма Наахара орто оскуолатыгар анал байыаннай дьайыыга сылдьар уолаттарбытыгар аналлаах стендэ арыллыыта буолла. Дойду көмүскэлигэр сылдьар Дархан Васильев ийэтэ Александра Семеновна Пахомова санаатын тириэртэ. Бу күн нэһилиэкпитигэр Тыа хаһаайыстыбатын сылын үөрүүлээхтик астылар.
Манна Үлэ Дьоруойа Петр Ионович Яковлев туһунан музыкальнай дьүһүйүүнү сэргии көрдүбүт. Улууспут баһылыга Степан Кузьмин, тыа хаһаайыстыбатын управлениетын салайааччыта Ион Кононов бэлиэ түгэнинэн эҕэрдэлэрин тириэртилэр уонна үлэһит дьоҥҥо Махтал суруктары туттардылар.
Бу сыл устата Дьоруойбутугар аналлаах элбэх тэрээһиннэр ыытыллаллара былааннанар. Петр Ионович олоҕо биһиэхэ өрүү холобур буолар.
Наина ЗЫКОВА, «Аартык» медиакиин эдкора