Амма улууһун ойуурун хаһаайыстыбата иһитиннэрбитинэн күн бүгүн улуус территориятыгар биир баһаар бэлиэтэнэр. Биллэрин курдук ыам ыйын 30 күнүттэн ураты баһаартан сэрэхтээх буолуу режимэ биллэриллэн турар.
“Бүгүн, бэс ыйын 16 күнүн туругунан Амма Наахара нэһилиэгиттэн 40 км сиргэ бэс ыйын 9 күнүгэр турбут 5А нүөмэрдээх баһаар өссө да умулларылла илик. Бүгүн күҥҥэ кини умайар иэнэ 490 гаҕа тиийдэ. Манна умулларыыга 91 баһаарынньык үлэлии сылдьаллар. Кинилэртэн 22-тэ “ГУА “Якутлесресур” үлэһитэ, 37 “Авиаотделения” десантнига, 21 Дьокуускайтан авиабаза десантниктара буолаллар. Ону сэргэ 11 олохтоох нэһилиэнньэттэн мобилизацияланан көмөлөһө сылдьаллар. Бүгүҥҥү буруо тыал хайысхата уларыйан Уус Майа улууһун баһаардарыттан кэллэ. Санатар буоллахха, баһаар сезона саҕаланыаҕыттан улууспутугар 10 ойуур баһаара тахса сырытта. Баһаардар бары кураанах этиҥ түмүгэр таҕыстылар. Ол да буоллар нэһилиэнньэ тыаҕа сылдьартан туттунарыгар, ойуурга баһаартан сэрэхтээх буоларыгар ыҥырабыт”, — диэн Амматааҕы ойуур хаһаайыстыбатын салайааччытын солбуйааччы Иван Никитин иһитиннэрдэ.
“Амма олоҕо” хаһыат