Кулун тутар 19 күнүгэр Сахабыт сирин бары киинэ тыйаатырдарыгар Улус.Медиа сайт бырайыагынан “Сахабэчээт” медиахампаанньа таһаарбыт “Мэхээлэчээн булчут” (“Мои таежные каникулы”) диэн уус уран киинэ көстөн, көрөөччүлэр дуоһуйа көрдүлэр, киинэни ылыннылар. Болугур нэһилиэгин олохтоохторо эмиэ киинэни киэҥ экраҥҥа тахсыбыт күнүгэр көрөр кыахтаннылар.
“Кулун тутар 19 күнүгэр күүтүүлээх «Мэхээлэчээн булчут» аптаах-алыптаах киинэ буолла. Биһиги дьиэ кэргэн оҕолорбутун кытта бу киинэни олус астына, сэргии көрдүбүт. Улахан, күүстээх үлэ барбыт. Киинэ айылҕаҕа харыстабыллаах сыһыаҥҥа, киһи киһиэхэ сыһыана, доҕордоһуу, үтүө санаа өрөгөйдөөһүнэ олус үчүгэйдик, оҕолорго өйдөтөр, үөрэтэр соруктаах оҥоһуллубута кэрэхсэбиллээх. Дьэ чахчы да төрөөбүт сирбитигэр-уоппутугар, айылҕабытыгар, айылҕа оҕолоругар тапталынан угуттуур, наһаа үчүгэй киинэ уһуллубут. Кыыл-сүөл, үөн-көйүүр киһилии саҥаран айылҕа иччитэ билэ-көрө, араҥаччылыы сылдьар диэн оҕолорго өйдөтөр, быһаарар суолтатын өссө үрдэтэн биэрэр. Сүрүн оруолга оонньообут уол Дамир Дьяконов наһаа талааннаах оҕо, тыа оҕото буолан дуу, оруолун итэҕэтиилээхтик оонньообута наһаа үчүгэй. Киинэ кэннэ оҕолорбутун кытта киинэ туһунан, туохха үөрэтэрин ырытыстыбыт. Оҕолорбутун тэҥҥэ илдьэ сылдьан сир астыыр, от үлэтигэр, айылҕаҕа сылдьар буоланнар ордук чугастык бу киинэни ылынан көрдүлэр, наһаа сөбүлээтилэр. Бу киинэни устубут, үлэлээбит тэрийээччилэргэ, бары устар хамаандаҕа, оонньообут, кыыллары саҥардыыга үлэлээбит артыыстарга барҕа махталбытын тиэрдэбит. Өссө кэрэхсэбиллээҕэ саһылы биһиги бэйэбит биир дойдулаахпыт, Болугур сириттэн силистээх -мутуктаах Айыына Кожурова наһаа үчүгэйдик саҥардыбыт. Күндү төрөппүттэри, оҕолоргутун кытта тэҥҥэ кэлэн көрүҥ диэн сүбэлиибит”, — диэн Болугур нэһилиэгин бибилэтиэкэрэ Марианна Егорова үллэһиннэ.
“Амма олоҕо” хаһыат