Бөтүҥ нэһилиэгин олохтооҕо, СӨ үөрэҕириитин туйгуна, РФ уопсай үөрэҕириитин бочуоттаах үлэһитэ Галина Яковлева дьиэтигэр урукку кэм ахтылҕанын таһаарар хос оҥордо. Бастакы ыалдьыттара, дьүөгэлэрэ, аймахтара кэлэн олус астынан, сэҥээрэн бардылар, хас биирдии малы көрөн оҕо саастарын, эдэр кэмнэрин санаатылар.
Галина Ивановна эппитинэн, кини хас да сыллааҕыта Дьокуускай куоракка баар ретро музейга сылдьан баран, “сайынны дьиэлэннэхпинэ маннык оностор эбиппин” диэн санаа киирбит. Урукку кэмнэртэн хаалбыт мал көннөрү сытара, кэнники умнууга да хаалыах курдуга. Аны бу кэнниттэн Амма нэһилиэгэр Наталья Шишигина аспыт эмиэ ретро музейын бэркэ сэҥээрэ көрбүтэ. Хас биирдии мал бу көннөрү мал эрэ буолбакка, бэйэтэ история буоллаҕа.
“Бу хоспор барыта төрөппүттэрбиттэн хаалбыт маллар буолаллар. Ол курдук ийэбиттэн хаалбыт атаҕынан иистэнэр массыына, дьиэ миэбэллэриттэн хомуот, олоппостор, сиэркилэ бааллар. Өссө былырыын туруоран саҕалаабытым уонна быйыл онтукпун ситэрдим. Эһээбит чымадаана, араадьыйата, гражданскай сэрии геройа Василий Чапаев статуэтката эмиэ оннуларын булан турдулар. Урукку дьон тугу да бырахпаттар этэ. Ийэм элбэх иһиттээҕэ. Олору барытын сыа-сым курдук илдьэ сылдьабын. Барыта харчыга кэлбитэ диэммин харыстыыбын. Ийэм күрүчүөгүнэн араас салфеткалары баайара, ону эмиэ харыстаан илдьэ сылдьабын. Бэйэм урукку кэмнээҕи салфеткалары интернетынан көрөн быысыбайдыыбын. Оҥорбут ретро хоспор дьүөгэлэрим, аймахтарым сылдьан, көрөн олус астыннылар, урукку эдэр кэммитигэр тиийэ сырыттыбыт диэн үөрэллэр, дууһалыын сынньанныбыт дииллэр.
Бэйэм эмиэ бу хоспор киирдэхпинэ, хайдах эрэ оҕо сааспар тиийбит курдукпун. Ханнык баҕарар киһи ааспыты саныахтаах, ону көлүөнэттэн көлүөнэҕэ тиэрдэн иһиэхтээх дии саныыбын. Сиэннэрбит бу хоско сылдьан элбэҕи билиэхтэрэ диэн эрэнэбин”, — диэн ретро хос хаһаайката Галина Ивановна Яковлева санаатын тириэртэ.
Бэйэ күүһүнэн оҥоһуллубут сэбиэскэй кэммит сорох түгэнин Галина Ивановна бэйэтэ устубут видеотунан билсиҥ.
“Амма олоҕо” хаһыат