Учуутал күнүн көрсө Н.Е.Иванов аатынан Бөтүҥ орто оскуолатыгар үөрэх сайдыытын түстээбит дьонтон биир киэн туттар, 15 сыл Бөтүҥ орто оскуолатыгар дириэктэринэн үлэлээбит, нэһилиэк Бочуоттаах гражданина, педагогическай үлэ уонна тыыл бэтэрээнэ Дьячковский Иван Михайлович төрөөбүтэ 95 сылыгар анаммыт стендэ аһылынна.
Иван Михайлович Дьячковскай тохсунньу ый 19 күнүгэр 1930 сыллаахха Алтан нэһилиэгэр төрөөбүтэ. Кини І-кы кылааска 1937 с. І Холгума начальнай оскуолатыгар киирбитэ. 1946 с. Алтан 7 кылаастаах оскуолатын бүтэрбитэ. Оскуола кэнниттэн 2 сыл холкуоска, 1 сыл нэһилиэк ааҕар балаҕаныгар үлэлээбитэ. 1947 с. комсомолга, 1957 с. ССКП чилиэнинэн киирбитэ. 1950 с. холкуостары салайар кадрдары бэлэмниир оскуоланы бүтэрэн 1952 сылга диэри агрономунан, бырабылыанньа солбуйааччы бэрэссэдээтэлинэн, 1953 с. Мэҥэ Ханалас комсомолун оройуоннааҕы кэмитиэтин инструкторынан үлэлээбитэ. 1953-1958 с.с Мэҥэ Хаҥалас улууһугар Александр Матросов аатынан колхоһугар бырабылыанньаҕа солбуйааччы бэрэссэдээтэлинэн ананан үлэлээбитэ. 1958 с. Амма оройуонугар Сатаҕай нэһилиэгэр көһөн кэлэн, 1961 с. диэри биригэдьиирдиир. Онтон 1961-1965 сс. диэри ССКП райкомун инструкторынан ананан үлэлээбитэ. 1965 с. Бөтүҥ нэһилиэгэр оскуола дириэктэринэн ананар. 1967 с. СГУ историческай факультетын кэтэхтэн үөрэнэн бүтэрбитэ. Оскуола дириэктэринэн 1965-1980 сс. үрдүк таһаарыылаахтык үлэлээбитэ. 1980-1985 сс. Бөтүҥ нэһилиэгин Сэбиэтин бэрэссэдээтэлинэн анаммыта. Нэһилиэк сайдыытыгар эмиэ үгүс сыратын уурбута. Үлэлээбит сылларыгар социалистическай куоталаһыыга нэһилиэк оройуоҥҥа бастаан көһөрүллэ сылдьар Знамяны ылбыта. Ити кэнниттэн оройуоҥҥа икки төгүл II, икки төгүл III миэстэни ылбыттара. 1980 с. Иван Михайлович «Социалистическай куоталаһыы кыайыылааҕа» знагынан наҕараадаламмыта. Олоҕун устата араас салайар үлэлэргэ, оскуола дириэктэринэн, Сэбиэт бэрэссэдээтэлинэн үлэлээн элбэх наҕараадалары ылбыта. 40 сыл устата агитаторынан, пропагандиһынан, «Билии» уопсастыба лиэктэринэн үлэлээбитэ, бастыҥ общественник этэ. Бочуоттаах сынньалаҥҥа тахсан баран уопсастыбаннай үлэҕэ күүһэ тиийэринэн кыттара, сүбэ-ама буолара. Иван Михайлович 2006 сыллаахха уһун ыарахан ыарыыттан олунньу 18 күнүгэр өлбүтэ. Иван Михайлович Бөтүҥ орто оскуолатыгар 15 сыл устата дириэктэринэн үлэлээбит, таһаарыылаах кэлэктииби салайан кэлбит үтүө киһи. Оскуолаҕа үлэлиир сылларыгар туох-баар күүһүн-уоҕун оскуола сайдыытыгар анаабыт, хас биирдии оҕо үөрэнэригэр, хас биирдии учуутал үлэлииригэр табыгастаах усулуобуйа баар буоларыгар сыратын уурбут салайааччы буолар. Бииргэ үлэлиир дьонун сөпкө аттаран, кэлэктиипкэ сыал туруоран, бииргэ үлэлээһин суолугар туох ыарахаттары көрсөн ону хайдах толороллорун сөпкө былааннаан кэлэктиип үлэтэ таһаарыылаах буоларын ситиспитэ. 1967-1968 сс. аҕыс кылаастаах оскуола маҥнайгы выпуһун, 10 үөрэнээччини таһаарбыта, комсомольскай тэрилтэ олохтоммута. 1972-1973 сс. саҥа типовой орто оскуола дьиэтэ үлэҕэ киирбитэ. 1974-1975 сс. орто оскуола маҥнайгы выпуһун таһаарбыта. Иван Михайлович үлэлээбит сылларыгар оскуола материальнай базатын тупсарыыга элбэх сыратын биэрбитэ.
Дьэ маннык үтүө салайааччы олоҕун сырдатар, билиһиннэрэр стендэни Иван Михайлович кыргыттара РФ уонна СӨ үтүөлээх учуутала Валентина Дьячковская уонна РФ уопсай үөрэхтээһинин бочуоттаах үлэһитэ, Дьокуускай куорат классическай гимназиятын үрдүк категориялаах учуутала, ушуга РФ спордун маастарыгар кандидат, Саха волейболга ассоциациятын бочуоттаах маастара Светлана Климова арыйдылар. Саҥа арыллыбыт стендэ ис хоһоонун уола, РФ уонна СӨ ОдЬКХ-тын бочуоттаах үлэһитэ, Бөтүҥ нэһилиэгин бочуоттаах олохтооҕо Эдуард Дьячковскай «Көлүөнэ ситимэ» диэн ааттаан туран 9 кылаас үөрэнээччилэригэр, ыҥырыылаах бэтэрээн кэллиэгэлэрбитигэр билиһиннэрдэ.
Мария ИВАНОВА