Мээндигигэ биир дойдулаахпыт, Саха норуодунай суруйааччыта Василий Егорович Васильев -Харысхал төрөөбүтэ 75 сылыгар аналлаах «Васильевскай ааҕыылар» буолан аастылар.
Ааҕыылары көҕүлээн, иилээн-саҕалаан биһиги энтузиаст-бибилэтиэкэрбит, СӨ култууратын туйгуна Матрена Захарова ыытта. Тэрээһин үөрүүлээх аһыллыытыгар Амма улууһун баһылыгын бастакы солбуйааччы Василий Бураев, улуус дьокутааттарын Сэбиэтин бэрэссэдээтэлэ Владимир Колосов, Мээндиги нэһилиэгин баһылыгын солбуйааччы Альбина Филиппова, улуустааҕы кииннэммит бибилэтиэкэ дириэктэрэ Прокопий Прокопьев, Василий Егорович бииргэ төрөөбүт балта Александра Терентьева эҕэрдэ тылларын эттилэр. Бу күн Баһылай Харысхал кини үбүлүөйдээх сылынан пааматынньыгар сибэкки дьөрбөтүн уурдубут.
Барыта 19 кыттааччы Баһылай Харысхал айымньыларын ырытан, рецензия суруйан ааҕыылар бэрт интэриэһинэйдик аастылар. Кыттааччылары Мээндиги орто оскуолатын нуучча тылыгар учуутала Розалия Охлопкова, «Алгыс» сынньалаҥ киинин дириэктэрэ Светлана Попова, баһылык солбуйааччыта Альбина Филиппова сыаналаатылар.
Түмүккэ оҕолорго 3 миэстэ Саян Павлов (Мээндиги), 2 миэстэ Дая Нестерева (Соморсун), 1 миэстэ Саймина Сивцева (Мээндиги) уонна Кылаан кыайыылаах Юля Игнатьева (Чакыр), улахан дьоҥҥо 3 миэстэ Анастасия Васильева (Соморсун), 2 миэстэ Наталья Лазарева (Мээндиги), 1 миэстэ Раиса Стручкова (Сулҕаччы), Кылаан кыайыылаах Абаҕаттан Юлия Яковлева буоллулар.
Бары кыайыылаахтар грамотанан, сертификатынан наҕараадаланнылар. Бу ааҕыыларга Болугуртан, Соморсунтан, Чакыртан, Сулҕаччыттан, Сэргэ-Бэстэн, Абаҕаттан, Мээндигиттэн кэлэн кыттыбыт дьоммутугар, оҕолорбутугар махталбытын биллэрэбит. Баһылай Харысхал аата, үлэлээбит үлэтэ, суруйан хаалбыт айымньылара үйэтитиллэ турдуннар.
Альбина ФИЛИППОВА.