Амма нэһилиэгэр киин баанньык хаһан аһылларын кэтэһэр киһи элбэх. Эрэдээксийэттэн кэлэн, “биллэрээрин эрэ хаһан аһылларын, суунабыт дуу суох дуу” диэн туоһулааччы үгүс. Дьэ онон ааҕааччыларбытыгар үөрүүлээх сонуну иһитиннэрэбит. Ыам ыйын 23 күнүттэн баанньык аана арыллан, саҥалыы тыыннанан үлэтин боруобалаан саҕалыыр.
“Баанньык кырдьык өр өрөмүөннэннэ. Ааспыт сыл ахсынньы ыйын бүтүүтэ арыллыахтаах этибит гынан баран, үп-харчы өттүнэн уустуктар тахсаннар тардыллынна. Ол эрээри син силигин ситэрдибит, толору хапытаалынай өрөмүөн ыытылынна. Манна улуус дьаһалтата 4 мөл. солкуобайтан тахса харчыны көрөн бүүс бүтүннүү өрөмүөннэннэ. Ону тэҥэ бэйэбит сантехникатыгар, миэбэлигэр эмиэ үп көрбүппүт. Истиэнэтэ сыбанан, кафелланан, урукку ортоку истиэнэтэ ылыллан, кэҥээтэ. Душтаах, иһирдьэ толору хааччыллыылаах.
Паарданар сир барыта липа маһынан оҥоһуллунна. Ититэр ситимэ эмиэ саҥардыллынна. Сылытыыта газгольдерынан бара турар. Аны кабинкалара аныгылыы датчиктаах буолар. Ол курдук хас биирдии кэлбит киһи төлөөн баран, илиитигэр браслет ылар. Ол браслетынан кабинатын аһар, ол аата хас биирдии суунааччы туспа кабинкалаах буолар. Барыта 48 кабинка баар. Маны тэҥэ таҥас сууйуу өҥөтүн киллэрдибит. Холобура кирдээх таҥастарын сууйтара ууран баран, тахсалларыгар илдьэ барыахтарын сөп буолар”, — диэн баанньыгы үлэлэтэр “Коммунсервис” МУП тэрилтэ салайааччыта Иван Слепцов.
Дьэ чахчы баанньык ситэн-хотон, үлэлииргэ бэлэм буолбут. Иван Степанович эппитинэн эр дьон уонна дьахталлар тус туспа күн суунуохтара. Ол курдук субуотаҕа дьахталлар, өрөбүл күн эр дьон. Баанньык бэс ыйын 21 күнүгэр диэри, сөтүөҕэ диэри үлэлиэ. Ол кэнниттэн сабыллан баран, балаҕан ыйын иннинэ аһыллыа. Сыана туһунан этэр буоллахха, биир суунуу 700 солкуобай. 5 саастарыгар диэри оҕолор босхо, 6-12 саастарыгар диэри 300 солкуобай тарыып олохтонно. Чэпчэтиилээх сыананан, ол эбэтэр 500 солкуобайынан пенсионердар, инбэлииттэр, элбэх оҕолоох ыаллар, анал байыаннай дьайыы кыттыылаахтарын дьиэ кэргэннэрэ, кинилэр төрөппүттэрэ туһаныахтара. Манна анал докумуоннарын көрдөрүөхтээхтэр. Баанньык сарсыарда 10 чаастан киэһэ 21 чааска диэри үлэлиир.Дьэ онон бүгүн баанньык арыллар, кэлэн үөрэ -көтө суунаргытын күүтэллэр.
“Амма олоҕо” хаһыат