Успуорду өрө тутар Сатаҕай ытык-мааны ыала Варвара Гаврильевна уонна Гаврил Иванович Орловтар дьиэ кэргэттэрэ өрөбүл күннэрин бэрт сэргэхтик, сонуннук атаардылар. Киэҥ спортивнай саалаҕа түмсэннэр хас даҕаны түһүмэхтээх күрэххэ тиритэ-хорута күрэхтэстилэр.
Алаһа дьиэ Далбар Хотуна Варвара Гаврильевна күн күбэй ийэ, элбэх сиэн амарах эбэтэ. Түөрт оҕону күн сирин көрдөрөн, улаатыннаран, көччөх гынан көмүс уйаларыттан көтүппүт, кинилэр тустарыгар күннэтэ кыһаллар. Эдэриттэн успуордунан дьарыктанар, олус кэрэ куоластаах ырыаһыт, оҕуруотчут бастыҥа, дэгиттэр талааннаах алаһа дьиэ хаһаайката. Оҕо төрөппүт холобуругар улаатар, ол курдук дьиэ-кэргэн оҕолоро бары айар-тутар талааннаах, үлэһит дьоннор. Варвара Гаврильевна биһиги нэһилиэкпит хороҕор муостааҕы иитэригэр, сыспай сиэллээҕи дэлэтэригэр улахан кыһамньытын ууран туран, бүгүн күҥҥэ диэри бэтэрэнээрийэ курдук уустук үлэҕэ илиитин араарбакка үлэлии сылдьар.
Аҕа баһылык Гаврил Иванович Сатаҕайга кэлэн олохсуйуоҕуттан араас үлэҕэ үтүө суобастаахтык үлэлээн, биһиги нэһилиэкпит сайдыытыгар улахан кылаатын киллэрбит киһи диэн сыаналыыбын. Ол курдук агрономунан, биригэдьииринэн, баһылыгы солбуйааччынан, кэлин спорт инструкторынан үлэлээбитэ. Билигин төһө даҕаны бочуоттаах сынньалаҥҥа олордор, кэтэх хаһаайыстыбатынан утумнаахтык дьарыктанар, уус-уран самодеятельность актыыбынай кыттааччыта. Гаврил Иванович дьиэ кэргэн тулхадыйбат тулааһына, бигэ тирэҕэ, суон дурдата, кэтит хаххата. Кини мындыр толкуйунан, тус холобурунан оҕолорун, сиэннэрин иитиигэ күннэтэ кыһаллар, олох үөһүгэр сүүрэ-көтө сылдьар, нэһилиэк биир киэн туттар ытык киһитэ буолар.
Иллээх дьиэ-кэргэн ырыаны тойугу кытта тэҥҥэ чөл олоҕу өрө тутар, үүнэр көлүөнэни бэйэлэрин холобурдарынан иитэр ыал буолаллар. Уһун өрөбүлтэн биир күнү ылан кэпсээтэххэ, тохсунньу 6 күнүгэр С.Д. Давыдов аатынан спортивнай саалаҕа улахан дьиэ кэргэн иһигэр хас даҕаны түһүмэхтээх күрэх буолла. Ол курдук, сыал ытыытыгар, остуол тенниһигэр, миэстэттэн ыстаныыга, волейболга күөн көрүстүлэр. Бу күрэххэ барыта 16 буоланнар, 5 саастаахтан 67 саастаахха тиийэ кытыннылар.
“Саҥа Дьыл өрөбүлэ биһиги дьиэ –кэргэҥҥэ саамай күүтүүлээх көрсүһэр кэммит буолар. Сиэн оҕолорбут үөрэх чиэппэрдэрин түмүктээн, каникулга тарҕаһан Дьокуускайтан, Майаттан, Чурапчыттан төрөөбүт төрүт түөлбэлэригэр, Сатаҕайбытыгар түмсэр үлэни, сынньалаҥы тэҥҥэ дьүөрэлээн бары бииргэ буолар биир кэрэ бэлиэ кэммит.
Ааспыт 2024 сыл биһиги дьиэ-кэргэҥҥэ үтүө түмүктэрдээх, кэрэ бэлиэ үтүө өйдөбүллэри хаалларда. Онон даҕаны сиэттэрэн саҥа 2025 сылбытын үөрүү көтөллөнөн көрүстүбүт.
Түмсүбүччэ дьиэ ис-тас үлэтин, хаһаайыстыба араас түбүктээх үлэлэрин күргүөмүнэн үмүрүтэн, сынньанарбытын да умнубатыбыт. 2025 сыл тохсунньу ый 6 күнүгэр дьиэ кэргэн иһинэн успуорт хас даҕаны көрүҥэр биирдиилээн уонна хамаанданан бастыыр иһин күөн күрэс тэринэн бэркэ диэн күрэхтэстибит, сынньалаҥмытын олус үчүгэйдик атаардыбыт.
Күрэхпит коммерческай буолан бэрт тыҥааһыннаахтык, эрийсиилээхтик ааста.
Миэстэттэн туран ыстаныыга Д.П. Коркин аатынан оҕо спортивнай оскуолатын 7 кылааһын үөрэнээччитэ Арылхан уонна Дьокуускай куорат 3№дээх оскуолатын 9 кылааһын үөрэнээччитэ Алеся, сыал ытыытыгар күтүөт уол Игорь Владимирович, остуол тенниһигэр мин, эһэлэрэ Гаврил Орлов, кыайан өрөгөйдөөтүбүт. Волейболга доҕордоһуу, түмсүү кыайда.
Эбэн эттэххэ, улахан сиэн кыыс Камилия Чурапчытааҕы Физкультура Институтун 1 курсун студенката, оҕунан ытыыга РФ маастарыгар кандидат, Алеся Дьокуускай куорат ЮнАрмиятын байыаһа, Чурапчыга многоборьеҕа оҕолорго сүүмэрэммит хамаанда оонньооччута, Арылхан Чурапчыга оҕолорго чэпчэки атлетикаҕа хамаандатын чилиэнэ, 2024 сылга 800 миэтэрэҕэ сүүрүүгэ республика чемпиона, игирэ кыргыттар Алтааналаах Алгыстаана Д.П. Коркин аатынан спортивнай оскуолаҕа үөрэнэллэр, сыал ытыытыгар дьарыктаналлар. Айсена сөбүлээн дьарыктанар дьарыга уруһуй, Эрсаан, Арылхан Аммаҕа Олоҥхо ыһыаҕар дьиэ кэргэнинэн олоҥхону толоруу күрэҕин кыттыылаахтара, Айхаан дьиэ кэргэттэри түмэр кэрэ уолбут.
Үүнэр-сайдар, Саргы дьаалы салаллар Сатаҕайбыт — барыбытын түмэр, аспытын-үөлбүтүн оҥорор, сир астыыр, оттуур-мастыыр сирбит, таптыыр, ахтар дойдубут буолар”,- диэн Гаврил Иванович сонунун үллэстэр.
Нэһилиэкпитигэр успуорду өрө тутар ыаллар баалларыттан биһиги олуһун үөрэбит. Кинилэр оҕолоругар, сиэннэригэр, биир дойдулаахтарыгар чэгиэн, чөл олохтоох буолууну, успуордунан утумнаахтык дьарыктаныы үгэһэ, бастатан туран, дьиэ кэргэнтэн тахсарын бэйэлэрин үтүө холобурдарыгар көрдөрөллөр.
Христина Скрябина.