Норуот бэйиэтэ В.М. Новиков-Күннүк Уурастыырап аатынан кииннэммит библиотека бастыҥ ааҕааччыларын, үлэбитигэр көмө — тирэх буолар дьонноругар Махтал киэһэтин тэрийдилэр.
Бу киэһэ биһиги бастыҥ ааҕааччыларбытын Михайлова Светлана Михайловнаны, Пестерева Татьяна Ильиничнаны, Неустроева Полина Петровнаны, Скрябина Марта Егоровнаны уонна ыытар тэрээһиннэрбитигэр мэлдьи кыттар «Үрдэл» оҕо уопсастыбаннай тэрилтэттэн Карамзин Яны, Александрова Анастасияны, Вензель Александраны, Карамзина Кристинаны, Малыкайцев Александры, салайааччыларын Бураева Зинаида Ивановнаны эҕэрдэлээтибит. Ян Карамзин бэйэтэ суруйбут «Второй среди Первых» диэн кэпсээнин дьоҕус кинигэ гынан таһаартаран бэлэхтээтэ.
Ыҥырыылаах ыалдьыттарбыт остуол тула олорон, итии чэй иһэ- иһэ ирэ-хоро кэпсэтэн, санааларын атастаһан, сэргэхсийэн, үөрэн, астынан тарҕастылар. Бу дьоро киэһэбитин СӨ култууратын үтүөлээх үлэһитэ Василий Неустроев баяҥҥа доҕуһуоллаан, СӨ үөрэҕириитин туйгуна, педагог — бибилэтиэкэр Людмила Оконешникова ылбаҕай ырыалары бэлэхтээтэ.
Биһиги бу ааһан иһэр сылга ыыппыт үлэбитин, кэлэр сыллааҕы былааммытын билиһиннэрдибит, хардары таабырын таайыстыбыт. Биэчэр кыттыылаахтарыгар Махтал суруктары, сэмэй бэлэхтэри туттардыбыт. Ыалдьыттарбыт астынан, махтал тылларын этэн тарҕастылар, бу этиллибит тыллар биһигини кынаттыыллар, күүс — көмө буолаллар.
Елизавета СИДОРОВА, ааҕааччыны кытары үлэлиир салаа кылаабынай бибилэтиэкэрэ