Москва куоракка норуоттар икки ардыларынааҕы уонна региональнай СМИ-лэр медиафорумнара ыытылла турар. Бу форумҥа Саха сириттэн суруналыыстар тиийэн кыттыыны ыллылар. Кинилэр ортолоругар биир дойдулаахпыт, А.Е. Кралин аатынан Абаҕа орто оскуолатын выпускнига, билигин Дьокуускайдааҕы култуура уонна искусство колледжын устудьуона Богдан Гермогенов баар.
“Мин култуура уонна искусство колледжыгар бастакы кууруска “Фото и видео творчество” диэн хайысхаҕа үөрэнэбин. Колледжпытыгар быйыл «Кэскил» оҕо издательство дириэктэрэ Ольга Ивановна Семёнова кэлэн “Школа межэтнической журналистики” диэн уруок ыыппыта. Уруокпут нэдиэлэҕэ биирдэ буолар этэ. Онно хас нэдиэлэ аайы ыстатыйа суруйаҕын. Ольга Ивановна саамай активнай оҕолору Москва медиафорумҥа куоракка илдьэ барбыта. Ол курдук миигин кытта өссө бииргэ үөрэнэр кыыһым Николина Семенова баар. Туох баар айаммыт, олорор сирбит буор босхо. Биир нэдиэлэ устата гостиницабытыгар олорон үөрэнэбит. Наһаа сэҥээрдим, интэриэһинэй баҕайы эбит. Форум кэмигэр Поклоннай гораҕа баар олус астык “Парк Победы” сылдьан көрдүбүт. Сөҕүмэр үчүгэй быыстапка. Аҕа дойду улуу сэриитин туһунан өссө үгүс чахчыны биллим”, — диэн Богдан Гермогенов иһитиннэрэр.
«Амма олоҕо» хаһыат