Болугур нэһилиэгэр аҕам саастаахтар декадаларынан сылын аайы бэрт интириэһинэй, туһалаах тэрээһиннэр буолаллар. Быйыл даҕаны саастаах дьоммут чуҥкуйан олорор диэни билбэккэ бары тэрээһиннэргэ көхтөөхтүк кытыннылар.
Ол курдук учутал күнүн көрсө, аҕам саастаахтар декадаларын чэрчитинэн алтынньы 2 күнүгэр, нэһилиэкпит көстүүтэ тупсаҕай буоларын туһугар, сылын аайы ыытыллар «Зоя Хатыҥнара» аахсыйа буолан ааста.
Алтынньы ый 7 — 9 күнүгэр — «Кэрэ көстүү» нэһилиэк сибэкки үүннэрээччилэрин түмсүүтэ кыттыылаах, култуура киинигэр араас сэдэх сибэккилэр быыстапкалара буолан ааста. Бу быыстапкаҕа 11 кэрэ аҥар кыттан, сибэкки отростогын наадыйар хаһаайкаларга биэртэлээтилэр.
Алтынньы ый 7 күнүттэн – 10 күнүгэр диэри нэһилиэкпитигэр «Ыалдьытымсах хаһаайка» диэн биир ураты тэрээһин буолла. Бу тэрээһиҥҥэ уопсайа 7 хаһаайка кыттан, бэйэлэрин ас астааһыҥҥа сатабылларын көрдөрдүлэр. Бу күрэх сыала – соруга диэн эдэр ийэлэргэ бэйэлэрин сэдэх бүлүүдэлэрин рецебын үллэстэн, дьүөгэлэрин ыҥыртаан дьиэлэригэр ыалдьыттаталлара. Кыттааччылар күрэҕи сөбүлээн, дьүөгэлэрин кытта көрсөн олус диэн астынан кытыннылар. Ол курдук, 1 миэстэҕэ – Саввина Татьяна Павловна, 2 миэстэҕэ – Софронова Любовь Большевична, 3 миэстэҕэ – Федорова Валентина Ивановна таҕыстылар. Анал ааттар эмиэ хаһаайыннарын буллулар — «Аламаҕай дьүөгэ» Софронова Мария Васильевна, «Минньигэс утах» Иванова Ульяна Ивановна, «Ураты мааны сандалы» Кожурова Маизо Михайловна, «Тупсаҕай бүлүүдэ» Иванова Туяра Георгиевна. Бу күрэхпитин барытын устан, таҥан кулинарнай видео оҥорон таһаардыбыт.
Алтынньы ый 8 күнүгэр култуура киинигэр — «Кулун атах чороон» туойунан оҥоһукка маастар – кылаас тэрилиннэ. Бу маастар кылааһы туой оҥоһукка үөрэхтээх Митиненко Роман Иванович оҥортордо. Дьон сөбүлээн, оҕолорго, улахан дьоҥҥо мантан кыһын былааҥҥа киллэрэн туойга куруһуок тэрийиэхпит диэн баҕалаахпыт.
Алтынньы ый 9 күнүгэр – «Хобдуо» остуол оонньууларыгар күрэх буолан ааста. Хабылыкка, хаамыскаҕа куруһуок салайааччыта, Болугур нэһилиэгин Бочуоттаах олохтооҕо, спорт ветерана – Никифорова Елена Семеновна ыытан баҕалаахтар сылдьан кыайыылааҕынан дьахталларга — Кузьмина Ульяна Юдовна, эр дьоҥҥо — Осипов Дмитрий Николаевич буоллулар. Дуобат уонна хаарты күрэҕэр социальнай үлэһит Аммосова Зоя Михайловна, аҕа түмсүүтэ Кузьмин Евгений Семенович ыытаннар — кыайыылааҕынан Григорьев Гаврил Егорович таҕыста.
Алтынньы ый 10 күнүгэр – Е.Е. Пахомов аатынан Болугурдааҕы орто оскуола социальнай педагога, флористика куруһуок салайааччыта Кононова Светлана Николаевна, үөрэнээччитинээн Николаева Лидалыын аҕам саастаахтарга эмиэ биир ураты күнү бэлэхтээтилэр. Ол курдук флористика ускуустубатын баһылаан, тыыннаах сибэккинэн букет оҥорон, дьоммут олус дуоһуйдулар, аралдьыйан, муусукалыын атын эйгэҕэ киирэн таҕыстылар. Флористика киһини олус сынньатар, санааҕын сааһылыыр диэххэ сөп эбит.
Алтынньы ый 11 күнүгэр нэһилиэкпит биир ураты дьоро күн буолан ааста. «Чөмчүүк» түмсүүбүт 10 сыллаах үбүлүөйдээх күннэрин бэлиэтээн, Чөмчүүк Далбардарын быыстапкатын көрөн харахпытын сымнатан, кэнсиэрдэрин көрөн дуоһуйдубут. Түмсүүбүт кыргыттара кырдьык даҕаны талааннара олус элбэх, ырыа, үҥкүү, фольклор эйгэтин баһылаан олус үчүгэй кэнсиэри бэлэх ууннулар.
Алтынньы ый 16 күнүгэр – Аҕам саастаах дьоммут декадаларын түмүктүүр «Көмүс сааһы уруйдуубут» тэрээһиммитигэр «Болугур нэһилиэгэ» МТ баһылыгын солбуйааччыта Эверстова Любовь Афанасьевна, кырдьаҕастар сэбиэттэрин бэрэссэдээтэлэ Кондакова Надежда Иннокентьевна, социальнай үлэһит Аммосова Зоя Михайловна эҕэрдэ тыл этэн, үбүлүөйдээхтэргэ бэлэх туттаран, остуол тардан, күрэхтэрбит түмүктэрин таһааран, эҕэрдэ суруктары, бириистэрбитин туттаран, нэһилиэкпит ыччаттара, ансамбыллара үҥкүү, ырыа доҕуһуоллаах кэнсиэр бэлэхтээн олус истиҥ, сэргэх киэһэ буолла.
Күндү дьоммутугар, элэккэй эбэлэрбитигэр, эйэҕэс эһэлэрбитигэр баҕарабыт кытаанах доруобуйаны, уһун дьоллоох олоҕу.
Евдокия Платонова.