Бүгүн ыам ыйын 27 күнэ — Бүтүн Арассыыйатааҕы бибилэтиэкэлэр күннэрэ. Бу күнү көрсө СӨ Национальнай бибилэтиэкэтэ «Кинигэ күүһэ» аахсыйаны тэрийэн ыытар. Аахсыйа аан маҥнай 2019 сыллаахха национальнай бибилэтиэкэҕэ СӨ култуура уонна духуобунай сайдыы министиэристибэтин өйөбүлүнэн тэриллэн ыытыллыбыта.
Быйыл “Кинигэ күүһэ” аахсыйа сэттис төгүлүн ыытыллан, Арассыыйа атын регионнарыттан кыттыы элбээн иһэр. Тэрээһин сыала-соруга оҕолорго ааҕыыны көҕүлээһин, кинигэҕэ тапталы иҥэрии, бибилэтиэкэ үлэтигэр уопсастыбаннас болҕомтотун тардыы буолар. Судаарыстыбаннай уонна муниципальнай былаас бэрэстэбиитэллэрэ, бастыҥ общественниктар уонна биллэр-көстөр дьон оҕолорго кинигэттэн айымньыны ааҕаллар, кинилэр олохторугар кинигэ оруолун туһунан кэпсииллэр. Быйылгы аахсыйа Саха сиригэр Ийэ дойдуну көмүскээччи сылыгар ананна. Болугурдааҕы олохтоох бибилэтиэкэ бу аахсыйаҕа сылын аайы кыттыһабыт. Быйыл оҕо эрдэхтэн кинигэни доҕор оҥостон билигин ситиһиилээхтик үлэлии-хамсыы сылдьар дьоммут оскуолабыт алын сүһүөх кылаас оҕолорун кытта көрүстүлэр, кинигэ олохторугар суолтатын туһунан үллэһиннилэр. Ол курдук бу сырыыга ааҕааччыларынан «Болугур нэһилиэгэ» тыа сирин түөлбэтин баһылыгын солбуйааччыта Любовь Эверстова уонна РФ уопсай үөрэхтээһинин бочуоттаах үлэһитэ, краевед, коллекционер Тимофей Никифоров буоллулар.
Ыалдьыттарбыт оҕолору күүтүүлээх сайыҥҥы сынньалаҥ саҕаламмытынан эҕэрдэлээтилэр уонна Любовь Афанасьевна “Бары бииргэ” диэн Радион Данилов кинигэтиттэн “Аһымал көмө” кэпсээни аахта, Тимофей Трофимович Болугур нэһилиэгин биир чаҕылхай уола, баай историялаах олоҕу олорон ааспыт Аҕа дойду Улуу сэриитин кыттыылааҕа, «Кыһыл Сулус» орден кавалера Семен Давыдович Григорьев туһунан “Семен Давыдович Григорьев” диэн кинигэтин билиһиннэрдэ. Оҕолор сэргээн иһиттилэр, араас ыйытыы биэрдилэр, ыйытыыларга эппиэттээтилэр. Тэрээһин ааҕааччылара оҕолорго кинигэни куруук доҕор оҥостоллоругар баҕардылар, “суруллубут суоруллубат” диэн бэргэн этиинэн сүбэлэрэ-амалара оҕону ааҕыыга көҕүлүүргэ угуйуо диэн баҕарабыт.
Быйылгы «Кинигэ күүһэ» аахсыйа ааҕааччыларыгар көхтөөх кыттыыларын иһин Махтал суруктар уонна оҕолорго туоһу суруктар туттарылыннылар. Кинигэ күүһүнэн оҕону сайдыылаах, култууралаах, үрдүк үөрэхтээх, киэҥ өйдөөх-санаалаах киһини иитэн таһаарарбытын, кинигэни ааҕыы туохха да тэҥнэспэт үчүгэй дьарык буоларын умнумуох.
Болугурдааҕы олохтоох бибилэтиэкэ