Болугур нэһилиэгэр сылын аайы ыытыллар » Уол оҕо охтума, аккыттан сууллума» бырайыак тэрээһинэ быйыл улуустааҕы О.П.Иванова — Сидоркевич аатынан оҕо сайдар киинин «Дьөһөгөй. Сир эдэр хаһаайыттара» бырайыагын чэрчитинэн ыытылынна. Бырайыак тэрээһининэн биэс түһүмэххэ күрэх сылгы базатыгар буолла. Сааскы сибиэһэй салгыҥҥа уолаттар астына күрэхтэстилэр, дьөһөгөй оҕотун кытта алтыстылар.
Күрэх Е.Е. Пахомов аатынан Болугур орто оскуолатын 6,7,8 кылаас уолаттарыгар ортолоругар «Болугур» ТХПК сылгы базатыгар ыытыллынна. Тэрийээччилэринэн Болугур нэһилиэгин дьаһалтата, М.А.Ноговицын аатынан култуура киинэ, Е.Е.Пахомов аатынан Болугур орто оскуолата, нэһилиэк аҕатын түмсүүтэ уонна «Болугур» ТХПК сылгыһыттара буоллулар. Күрэххэ барыта биэс хамаанда биэс түһүмэххэ күрэхтэстилэр. Бастакы түһүмэххэ сылгыга сыһыаннаах викторина, иккискэ бириэмэҕэ аты сыарҕаҕа көлүйүү, үһүскэ сыарҕалаах аты айаннатыы, төрдүс сылгыга сыһыаннаах ырыа — хоһоон, бэһис түһүмэх хомуур хапсаҕайа буолла. Күүстээх, тыҥааһыннаах киирсии түмүгэр бастакы миэстэни «Тыа оҕото», иккиһи «Урааҥхайдар», үсүһү «Дьөһөгөй» хамаандалар ылан өрөгөйдөөтүлэр, тэрийээччилэр бириистэрин тутан астыннылар.
Күрэх кэннэ сылгыһыттар оҕолору, ыалдьыттары сылаас миининэн, чэйинэн күндүлээтилэр. Саха киһитэ сылгы куттааҕын бүгүҥҥү тэрээһин дьиҥ чахчы туоһулаата. Оҕолор сыарҕалаах атынан хатааһылаан, сааскы салгыҥҥа дуоһуйа сынньаннылар. Күрэҕи тэрийээччилэргэ, сыарҕалаах аттары уларсыбыт биир дойдулаахтарбытыгар Тимофеев Гаврил Васильевичка, Тимофеев Никифор Никифоровичка оҕолор, төрөппүттэр ааттарыттан махтанабыт. Маннык туһалаах, көхтөөх тэрээһиннэр өрүү да ыытылла турдуннар.
Сахаяна КОЖУРОВА