Амма улууһун тыатын хаһаайыстыбатын управлениетын салайааччытын солбуйааччы Ньургун Петров уонна кылаабынай агроном Николай Гаврильев Строд аатынан уонна «Соморсун» хаһаайыстыбаларыгар тахсан бурдук төһө сиппитин бэрэбиэркэлээн, үлэни-хамнаһы билсэн кэллилэр. Миэстэтигэр хаһаайыстыба бэрэссэдээтэллэрэ Василий Тимофеев уонна Ксенофонт Федоров көрсөн үлэни билиһиннэрдилэр.
Балаҕан ыйын 4 күнүн туругунан улуус туорахтаах култуураны ыһар хаһаайыстыбаларыттан хомуур үлэтин «Амма» АУо уонна Абаҕаҕа Строд аатынан хаһаайыстыба ыыта сылдьаллар. Абаҕалар хомуурга балаҕан ыйын 4 күнүттэн киирэн күүскэ үлэлээн эрэллэр.
«Эбиэс быһыытыгар икки «Вектор-410 комбайн, үс массыына үлэлии сылдьаллар. Уопуттаах поварбыт Петр Петрович Деляев минньигэс аһынан хааччыйар. Хомууру быйыл саҥа ыспыт Мээндиги сиригэр баар Октябрь чараҥа диэн бааһынатыттан саҕалаатыбыт. Бу бааһынаны биһиги Дьокуускайдааҕы научнай -чинчийэр институттан арендаҕа ылбыппыт. Барыта 150 гектар . Билиҥҥитэ үүнүү үчүгэй. Уопсайа 550 ыһыылаахпыт. Ол иһигэр 30 гектар сэлиэһинэй, 50 гектар ньэчимиэн уонна атына эбиэс. Хомууру улахан ардахтар, хаар иннинэ бутэрбит киһи диэн баҕалаахпыт. Быйыл от үүнүүтэ үчүгэй. Билиҥҥитэ былааммытын 136 бырыһыан толорон иһэбит. Сирбит бүтүөр диэри оттуохпут. Эбии аһылыкка диэн сенаж, сиилэс бэлэмнээтибит. Онно былааммытын эмиэ толорбуппут», — диэн Строд аатынан хаһаайыстыба бэрэссэдээтэлэ Василий Тимофеев билиһиннэрдэ.
Улуус тыатын хаһаайыстыбатын управлениетын салайааччытын солбуйааччы, бэйэтэ бу хаһаайыстыбаҕа агрономунан үлэлии сылдьыбыт Ньургун Петров уонна улуус кылаабынай агронома Николай Гаврильев анал приборунан, илиилэринэн да тутан-хабан, этэргэ диэри уопуттаах харахтарынан да көрөн бурдук ситиитин быһаардылар. Онно анаан хомуллубут бурдугу анал приборга уктулар уонна салгыы хомуйуохха сөп диэн түмүккэ кэллилэр. Агрономнар быһаарбыттарынан өскөтүн сиппэтэх бурдук хомуллуннаҕына, кини маҥхааһайга угуллан баран «умайан» хаалар эбит.
Салгыы аны хомуурга киирээри бэлэмнэнэр, быйыл 1000 туонна бурдук угуллар кыахтаах маҥхааһайын туппут «Соморсун» ТХПК-ҕа айаннаатылар. Манна кинилэри бэйэтэ физкультурник идэлээх, Амматааҕы оҕо спортивнай оскуолатыгар чэпчэки атлетика старшай тренеринэн үлэлээбит, дойдутугар тахсан хаһаайыстыба салайааччытынан үлэлииргэ сөбүлэҥин биэрэн тиритэ-хорута үлэлии сылдьар Ксенофонт Федоров көрүстэ.
«Биһиги уопсайа икки бааһыналаахпыт. Ыһыыбыт иэнэ 300 га. Онно барытыгар эбиэс ыһыылаахпыт. Хомуурга балаҕан ыйын 5 күнүттэн тахсыахпыт. Биир комбайн, биир КАМАЗ, биир МТЗ тыраахтыр үлэлиэхтэрэ. Үүнүү үчүгэй, исписэлиистэр оруобуна сиппит диэн эттилэр», — диэн Ксенофонт Григорьевич этэр.
Улуус тыатын хаһаайыстыбатын управлениетын салайааччытын солбуйааччы Ньургун Петров бэлиэтээбитинэн хаһаайыстыба гаттан 20-чэ центнергэ чугаһатары ылыыһык. Онтон кылаабынай агроном Николай Гаврильев бары хаһаайыстыбаларга үүнүү үчүгэй, онон былааммытын аһары толорорбут буолуо диэн сабаҕалыыр. Кылаабынайа күн-дьыл туран биэриэн наада. Хомууру быһа сабаҕалаан, бары көрсөр ыарахаттары учуоттаан балаҕан ыйын бүтүүтэ түмүктүүргэ соруктаналлар. Николай Степанович 2016-2017 сылларга ылыллыбыт комбайнар эргэрбиттэрин, алдьаналлара элбээн иһэрин этэр. Ол курдук холобура «Болугур» хаһаайыстыба хомуурун саҕалаары гынар да, техникалар моһуоктаан кыайан быстарбакка сылдьар. Билигин сүрүн күүс аны хомуллар бурдугу кууллааһыҥҥа, дьаарыстааһыҥҥа ууруллар. Хаһаайыстыбалар субуотунньукка тахсар тэрилтэлэри эбиэттэтэллэр, өссө күрэх биллэрэн үчүгэй көҕүлээһини оҥордулар. Бу курдук бурдуктаах Аммабытыгар хомуур үлэтэ күргүөмнээн саҕаланан эрэр.
«Амма олоҕо» хаһыат