Эмис нэҺилиэгэр Суола үрэх тардыытыгар сытар алта нэҺилиэк үгэс буолбут доҕордуу көрсүҺүүтэ ыытылынна. Барыта 150 кыттааччы мустан спорт алта көрүҥэр күрэхтэстилэр, ыллаан-туойан да бардылар.
«БэҕэҺээ нэҺилиэкпитигэр «Суола-2026» диэн Суола үрэх тардыытыгар сытар алта нэҺилиэк, ол курдук Хайахсыт, Өлөчөй, Бүтэйдээх, Сатаҕай, Алтан, Эмис нэҺилиэктэрин бэтэрээннэрин доҕордуу үтүө үгэс буолбут күрэхтэҺиилэрэ буолан ааста. Күн устата ох саанан ытыыга, дуобакка, дартска, салгын саатынан ытыыга, хабылыкка, хаамыскаҕа уонна волейболга бэрт эрийсиилээх киирсиилэр буоллулар. Бу көрүҥнэргэ барытыгар биҺиги нэҺилиэкпит бэтэрээннэрэ олус үчүгэйдик кииристилэр. Ол курдук ох саанан ытыыга уонна сахалыы остуол оонньууларыгар бастакы, дартска, дуобакка, остуол тенниҺигэр иккис, сыалы ытыыга үҺүс уонна волейболга төрдүс миэстэлэри ылан эрэллээхтик чемпион үрдүк аатын ыллыбыт. Бу күн чахчы да доҕордоҺуу киэҺэтэ буолла. КүрэхтэҺии түмүгэ тахсан түүн биир чааска тарҕастыбыт. Кэлбит ыалдьыттарбыт тэрээҺини астынан бардылар.
Сүрүн тэрийээччилэринэн, ыытааччыларынан спорт исписэлииҺэ Нонна Николаевна Ноговицына, үҺүс көлүөнэ салайааччыта, финансиспыт Прасковья Романовна Бубякина, спортсаалабыт дириэктэрэ Валентин Павлович Николаев, нэҺилиэк дьокутаата Александр Александрович Ларионов буоллулар. Хойукка диэри буолбут тэрээҺиҥҥэ кими да аччыктаппакка, үстэ төхтүрүйэн ас астаан киллэрэн атыылаабыт асчыт кыргыттарга махтанабын. Кулууп дьаҺалта да үлэҺиттэрэ бу элбэх киҺи кыттыылаах улахан тэрээҺини кыайа-хото туттулар. Саала иҺэ ыраас буоларын туҺугар Влада Константиновна, Степан Степанович кыҺаллан үлэлээбиттэрин бэлиэтиибин. Онон нэҺилиэкпит дьоно бары түмсэн эмистэр бу сылга биир улахан тэрээҺиммитин этэҥҥэ ыыттыбыт. Онон бары кыттыспыт дьоҥҥо өссө төгүл махталбын тириэрдэбин»,- диэн Эмис нэҺилиэгин баҺылыга Прокопий Бубякин сырдатта.
«Амма олоҕо» хаҺыат