«Билэргит курдук саас муус устарга бастакы форуму тэрийбиппит. Бары нэһилиэктэртэн, Дьокуускай куораттан кэлэн кыттыыны ылбыттара. Хас да сиэксийэ үлэлээбитэ. Онно үгүс элбэх этии киирбитэ. Олору ырытан, дьүүллэһэн баран Киин сүбэ резолюция ылыммыта. Манна даҕатан эттэххэ, түмсүүбүтүгэр хас да Сүбэ баар. Ол курдук Тойон сүбэҕэ аҕа баһылык бэйэтэ, ону сэргэ солбуйааччылара, управлениелар салайааччылара уонна нэһилиэк бары баһылыктара киирэллэр. Тоҕо диэтэр биһиги түмсүүбүт улуустааҕы буоларынан, үрдүкү салалтаны кытта тэҥҥэ үлэбитин ыытыахтаахпыт, онно кинилэр өйөбүллэрэ баар буолуохтаах. Иккис сүбэ Киин сүбэ уонна үһүс Түмэр сүбэ диэн. Буолан ааспыт баһылыктар планеркаларыгар оҥорбут Резолюциябытын билиһиннэрэн баран бигэргэттэрдибит, баһылыктар бары Тойон сүбэҕэ киирэргэ, күүс-көмө, бииргэ үлэлииргэ сүбэлэстилэр, санааларын билиһиннэрдилэр. Улууспут аҕа баһылыга Степан Николаевич Кузьмин бу Резолюциянан анал уураах таһаарыахтаах. Ол таҕыста да, үлэ былаанын оҥостон, бу сыл бүтүөр диэри былааннаах үлэлэрбитин ыытыахпыт, — диэн түмсүү бэрэссэдээтэлэ Петр Табунанов сырдатта.
Планеркаҕа Резолюцияны билиһиннэрэ өссө Дьокуускай куораттан өрөспүүбүлүкэтээҕи лиссиэй интэринээт дириэктэрин солбуйааччы, саха тылын харыстааһыҥҥа айымньылаахтык үлэлиир «Күн» оҕолор түмсүүлэрин салайааччыта Клара Романова, Киин сүбэ чилиэннэрэ, бэрэссэдээтэли солбуйааччы Вероника Стручкова уонна сэкэрэтээрэ Наталия Рязанская кыттыыны ыллылар.
Петр Валерьевич бу туһунан сиһилии билиһиннэрбитин хаһыаппытыгар билсээрин. Сурутун, ааҕын. «Суруллубут суоруллубат».
«Амма олоҕо» хаһыат