“Күһүҥҥү күммүт-дьылбыт эрэ мэһэйдээбэтэр хомуур үлэтэ кэмигэр түмүктэниэ, былааннаах бурдук кэлиэ этэ” дэһэллэр тыа хаһаайыстыбатын управлениетын салайааччыта Ион Кононов уонна кылаабынай агроном Николай Гаврильев. Атырдьах ыйын 28 күнүгэр кинилэр саамай элбэх ыһыы сирдээх “Амма” АУо хаһаайыстыбатыгар тахса сырыттылар. Манна бааһынаҕа сэлиэһинэй быстарыыта буола турарын көрдүлэр, агроном Назар Черкашины кытта үлэ түбүктэрин кэпсэттилэр.
Күһүҥҥү силбиктээх ардах хомуурга мэһэйдиир буолбут. Назар Черкашин бэлиэтээбитинэн, ардахтар мэһэйдээбэтэллэр хомуур тэтимнээхтик барыа этэ диир.
“Биһиги хомуурга атырдьах ыйын 24 күнүттэн боруобалаан тахсыбыппыт. Кыратык сииктээх соҕус этэ. Ол иһин тохтообуппут. Онтон кураан күннэр турбуттарыгар сэлиэһинэйи уонна ньэчимиэни быстара сылдьабыт. Ол гынан баран бу саҕаламмыт ардахтар үлэ хаамыытын эмиэ тохтотоллор буоллаҕа. Эбиэс өссө да ситэ илик. Билиҥҥитэ түөрт комбайн, түөрт “ЗИЛ, биир «Урал» массыыналар үлэлии сылдьар. Дьэ ол гынан баран бу ардахтар да, хойуу туман да хомуурга мэһэй буолар. Толору күүспүтүнэн тахса иликпит. Күн бүгүн хомуурга диэн уопсайа 30 киһи үлэлии сылдьар”, — диэн агроном билиһиннэрэр.
Быйылгы ыһыыга бу хаһаайыстыба уопсайа 1610 гектар сир ыһыылаах. Мантан 596 гектар ньэчимиэн, 777 гектар эбиэс уонна 237 гектар сэлиэһинэй. Агроном этэринэн курааннаан үүнүү хайа да сыллааҕар мөлтөх. Урукку сылларга гектартан ортотунан 14-15 центнер бурдук кэлэр буоллаҕына, быйыл 8 центнер хомулла турар.
“Төһө да кураан дьыл турдар былааннаах бурдукпутун ылыахпыт дии саныыбыт. Быйыл былаан 3906 тонна. Хомууру билиҥҥитэ бу “Амма” хаһаайыстыбата саҕалаата. Атын түөрт хаһаайыстыбабыт өссө киирэ иликтэр. Бурдук ситэ буһарын кэтэһэллэр. Күн-дьыл туран биэрдэҕинэ бу күннэргэ киириэхтэрэ” – диэн этэр улуус кылаабынай агронома Николай Гаврильев.
Тыа хаһаайыстыбатын управлениетын салайааччыта Ион Кононов бааһыналары көрөн баран, бурдук тиийэн сүөкэнэр ыскылаатын көрдө. Манна быйыл саҥа бэйэлэрин сакаастарынан оҥоһуллан кэлбит бурдук кууллуур оборудованиены көрдө.
Илии үлэтин чэпчэтэр, куллааһыны түргэтэтэр кыаҕы биэрэр техника быйыл үчүгэйдик үлэлээтэҕинэ, табыгастаах эбит диэтэхтэринэ, кэлэр сылтан бурдуктаах хаһаайыстыбаларга бу техниканы атыылаһыыга үлэлэһиэхпит диэн салайааччы этэр.
Сиһилии от, бурдук хомуурун туһунан хаһыаппытыгар сырдатыахпыт.
“Амма олоҕо” хаһыат