М.А.Ноговицын аатынан Болугурдааҕы култуура киинигэр Улуу Кыайыы 80 сылынан, Арассыыйаҕа Аҕа дойду уонна Саха сиригэр Ийэ дойду көмүскээччилэрин сылларынан, ону тэҥэ нэһилиэккэ биллэриллибит дойдуга бэриниилээх буолуу уонна өйдөбүнньүк сылларынан, итини сэргэ биир дойдулаахтарбыт Аҕа дойду сэриитин кыттыылаахтара ини-бии Борисовтар ааттарын үйэтитэр сыаллаах оскуола орто уонна үрдүкү сүhүөх оҕолоругар «Мы, россияне, помнить будем вечно» диэн хоhоон ааҕыытын күрэҕэ ыытылынна. Бу күрэҕи олохтоох уонна оскуола бибилэтиэкэлэрэ, нэhилиэк бэтэрээннэрин сэбиэтэ тэрийэн ыыттылар.
Болугур нэһилиэгиттэн төрүттээх ини-бии Николай, Егор, Савва, Петр уонна Василий Борисовтар Аҕа дойду Улуу сэриитигэр Ийэ дойду көмүскэлигэр төрөөбүт алаастарыттан туруммуттара. Николай, Петр уонна Василий сэрии толоонугар охтубуттара, Егор уонна Савва дойдуларыгар төннөн кэлэн олох уйгутун уhансан үлэлээбиттэрэ-хамсаабыттара. Күрэхпитигэр дьүүллүүр бэтэрээн учууталларбыт – Надежда Кондакова, Альбина Павлова уонна Варвара Кондакова үлэлээтилэр. Хоhооммут күрэҕэ балаhыанньа быhыытынан кылаастан оҕолор учууталы уонна төрөппүтү кытта кыттыыны ылыахтаахтар, бэйэлэрэ талан сахалыы эбэтэр нууччалыы хоhоону ааҕаллара көҥүл. Күрэхпит алын сүhүөх кылаас оҕолоругар бу иннинэ ыытыллыбыт хоhоон күрэҕин муҥутуур кыайыылаахтара 4 кылаас уолаттарын ааҕыыларыгар (кыл. салайааччыта Орлеяна Кожурова) «Ийэ сүрэҕэ» хоhоонунан саҕаланна. Кылаастар бары бэлэмнэнэн оҕолор, учууталлар уонна төрөппүттэр көхтөөхтүк кытыннылар, сэрии тыйыс түгэннэрин, хабыр охсуhууларын, кыайыы өрөгөйүн хоhуйар хоhооннорун иэйиилээхтик аахтылар. Дьүүллүүр сүбэ быhаарыытынан орто сүhүөххэ түмүк маннык буолла: 1 миэстэҕэ – 7 “а” кылаас «Это было в мае на рассвете» диэн Г.Рублев хоhоонун ааҕан (кыл. салайааччыта Наталья Кузьмина), 2 миэстэҕэ – 5 кылаас «День Победы в огнях салюта» Эдуард Асадов хоhоонунан (кыл. салайааччыта Ганира Нестерова), 3 миэстэҕэ – 7 “б” кылаас (кыл.салайааччыта Алена Евсеева) «Помните» Роберт Рождественскай хоhоонун кылаастар оҕолоро учууталларын уонна төрөппүттэрин кытта ааҕаннар тигистилэр.
Улахан кылаастарга 1 миэстэни 10 кылаас «Нас двадцать миллионов» Расул Гамзатов хоhоонунан (кыл. салайааччыта Любовь Моисеева), 2 миэстэни 8 “б” кылаас эмиэ Расул Гамзатов «Нас двадцать миллионов» хоhоонунан (кыл. салайааччыта Светлана Кононова), 3 миэстэни 8 “а” кылаас (кыл. салайааччыта Зоя Корнилова) фронтовик суруйааччы Макар Кузьмин — Макар Хара «Саллаат суруктара» айымньытынан эмиэ учууталларын, төрөппүттэрин кытта доргуччу ааҕан ыллылар. Маны таhынан ини-бии Борисовтар аймахтара «Бастыҥ ааҕааччы» диэн анал аат туруоран, бириис олохтоон күрэх түмүгүнэн бу анал аат кыайыылааҕынан 10 кылаас үөрэнээччитэ Афанасьев Богдан буолла. Нэhилиэк бэтэрээннэрин сэбиэтэ (салайааччы Кондакова Н.И.) икки анал аакка бэйэлэрин сэмэй бэлэхтэрин туттардылар. Ол курдук «Память потомков» анал ааты 8 “б” кылаас үөрэнээччитэ Потапов Глеб уонна «Выразительность исполнения» анал ааты 8 “а” кылаастан Саввина Сандаара ыллылар. Бары кыттыбыт оҕолорбутугар, кылаас салайааччыларыгар, төрөппүттэргэ истиҥник махтанабыт. Хоhоон ааҕар дьоҕургутун сайыннара туруҥ диэн баҕа санаабытын этэбит!
Марианна ЕГОРОВА