С.Я. Левин аатынан норуот айымньытын дьиэтигэр баар “Экстра- Синема” киинэ экраныгар “Мэхээлэчээн булчут ” диэн урут бары сөбүлээн ааҕар Тимофей Сметанин уонна Яков Стручков кэпсээннэригэр олоҕуран уһуллубут уус уран киинэ көһүннэ. Киинэни олохтоохтору кытта сэргэ “ Күөх ыллык” медицинскэй-чэбдигирдэр киин сынньанааччылара эмиэ көрөн бэркэ астыннылар, «хаста да көрүөхпүт этэ» дэстилэр.
Александр Степанов, 47 саастаах, анал байыаннай дьайыы бэтэрээнэ, Ньурбаттан төрүттээх, Дьокуускай куорат олохтооҕо, наркологическай балыыһа младшай медперсонала: ,,Киинэни көрөн сөбүлээтим. Киинэ ордук эдэр оҕолорго туһаайыллар, иитэр-үөрэтэр хайысхалаах. Олус күлүүлээх, көрүдьүөстээх. Мэхээлэчээн булчут сиэнэ Мишука ыт оҕолорун кытта доҕордоһуута, кыыллар тылларын өйдүүр дьоҕура аһыллара, барытын ыйытан тыынар тыыннаахха сыһыана уларыйан айылҕаны, кыыллары харыстыырга үөрэнэрин олус сөбүлээн көрдүм. Манна аныгылыы компьютернай сюжеттар киинэни олус тупсарбыттар. Барыта үчүгэй, киһи хаста да көрүөн сөп».
Борис Шарин, 24 саастаах, Мэҥэ Хаҥалас Төҥүлүттэн сылдьар: ,,Биһиги бу «Күөх ыллыкка» сынньана таарыйа спортивнай саалаҕа теннискэ күҥҥэ иккитэ дьарыктанабыт. Маны сэргэ кииҥҥэ буолар тэрээһиннэргэ барытыгар кыттабыт. Бэҕэһээ олохтоох кулуупка “Мэхээлэчээн булчут” киинэни көрөн баран олус сөбүлээтим. Киинэ үөрэтэр, сүбэлиир хайысхалааҕын биллим. Ыччат дьоҥҥо үчүгэй эбит. Айылҕа көстөрө биһиэхэ сахаларга олус чугас. Ыттары олус астынным, сиэн уол наһаа үчүгэйдик оруолугар оонньуур, Мэхээлэчээн булчут эмиэ. Ыт киһи доҕоро буолара өссө бигэргэннэ. Өссө хаста да көрүөм этэ».
Елизавета Иванова, 55 саастаах, «Дарст»-ка l разрядтаах, адаптивнай спортка остуол тенниһигэр Vl, VII кылаастаах спортсменка, Майа нэһилиэгин олохтооҕо: ,, Мэхээлэчээн булчут,, киинэни көрөн баран сөбүлээтим. Киинэ оҕолору үөрэтэр, айылҕаны кытта алтыһыыга угуйарын ордук сөбүлээтим. Киинэҕэ сырдык тайах бу Аҕа саастаах киһи оруола дии санаатым. Тайах оҕолорго саҥата суох сүбэтэ, кинини таарыйдахха киниттэн кэлэр энергия олус күүстээхтик киһиэхэ иҥэр. Кыыллар саҥаларын өйдөөн, кинилэри кытары аһаҕастык кэпсэтэллэр. Көрдөөх киинэни көрөн көрөөччү үйэтэ уһуур, күннээҕи туруга тупсар эбит. Бу киинэни көрө олорон айылҕаны таптыырга, истэ үөрэнэргэ, алтыһарга үөрэниэххэ сөп. Мэхээлэчээн булчут сиэнигэр бэйэтин олоҕун кэпсээн сиэнин, ситимҥэ симиллибит куорат оҕотун үөрэтэр. Киинэни оҕолор олус сөбүлүүһүктэр».
Ирина КОРЯКИНА-ОЛЕСОВА