Бу күннэргэ Амма улууһун култуурунай олоҕо өрө оргуйан олорор диэтэхпитинэ сыыспаппыт буолуо. Саха тыйаатырын гастрола, онтон Саха эстрадатын тыйаатырын мюзикла тураннар, “букатын кулууптан тахсыбатахпыт үһүс күнэ” диэн күлэ-үөрэ этэллэр.
Сааскы күммүт чаҕылыйа тыган, быйыл ааспыт сыллааҕар арыый эрдэлээн дуу, онон-манан чалбахтар тахсаннар, букатын саас толору киэбэр киирбит курдук. Маннык ураты күннэргэ гастроллар саҕаланан, улуус дьоно саас кэлбититтэн эрэ буолбакка, олус сэргэхсийэр. Тапталлаах артыыстарын тута олорон көрөн, өссө ардыгар табылыннаҕына кинилэри кытта хаартыскаҕа да түһэн, умнуллубат күннэри бэлэхтэһэллэр. Саха судаарыстыбаннай тыйаатырын испиктээхтэрэ бүтээттэрин кытта тута сөрөөн, аны бэйэбит биир дойдулаахпыт Татьяна Чаранская салайар Саха эстрадатын артыыстара “Кынаттаах таптал” диэн музыкальнай испэктээхтэрин көрдөрдүлэр. Бу бары сөбүлээн көрөр, Арассыыйа киинэтин классиката буолбут “Любовь и голуби” диэн киинэтигэр олоҕуран туруоруллубут испэктээх. Дьон-сэргэ 300 миэстэлээх сааланы тобус толору олорон, өссө сорохтор кытыыга олоппосторго тиксэн бэртээхэй көр-күлүү аргыстаах, ырыалаах-тойуктаах, үҥкүүлээх-битиилээх испэктээҕи көрдүбүт. Хара бастакыттан бэйэбит сөбүлүүр артыыстарбыт киинэҕэ көрбүт сөбүлүүр геройдарбытын оонньоон, тута ылыннылар. Аны киинэни сахалыы тыыҥҥа, буолаары буолан, олох да улууспутугар буола турар айан -тутан, оҥорон таһаарбыттара өссө чугаһытта. Холобура геройдар, «ити ханна барда, Болугурдаата дуо» диэн кэпсэтэн, олох да бэйэбит дьоммут буолан хаалан, чугастык ылынныбыт. Хас биирдии көстүү кэнниттэн дохсун ытыс тыаһа хабылла олордо. Кэрэхсэбиллээҕэ диэн манна бэйэбит биир дойдулаахтарбыт бааллар. Ол курдук Долун Борисов, Сияна, Амгаяна бэйэлэрин оруолларын олус итэҕэтиилээхтик оонньообуттарын, талааннарын көрөн бука бары астыннылар, ытыстарын тыаһын харыстаабатылар. Атын оруолларга оонньообут таптаан истэр ырыаһыттарбыт эмиэ олус сөхтөрдүлэр.
“Сахабыт эстрадатын тыйаатырын “Кынаттаах таптал” музыкальнай испэктээҕэ астыктык туруоруллубут. Олох биир тыынынан ити дэриэбинэ олоҕор киирэн ыллыбыт, ылластыбыт даҕаны, ытастыбыт даҕаны. Оруолларын хас биирдиилэрэ аһары бэркэ оонньотулар, киһи сөҕүөх хайдах эрэ ырыаһыт — ыллыахтаах эрэ курдук саныырбыт. Ону баара оннук эрэ буолбатах эбит. Ырыаһыттарбыт олох дьиҥ артыыстар эбит. Ис истэриттэн оонньууллар. Испэктээх наһаа бэһиэлэй, чэпчэки — олох киһи эрэ сынньанар, күлэр-үөрэр. Биир дойдулаахтарбыт Аммалар баалларыттан киэн туттабыт, махтанабыт бачча элбэх буолан биһигини, көрөөччүлэри күллэрэн, үөрдэн олохпутун уһата сылдьалларыгар! Махтал!”, — диэн көрөөччү Лена Вензель санаатын үллэһиннэ.
Көрөөччүлэр Амма нэһилиэгиттэн буолбакка, чугас сытар нэһилиэктэри ааһан, ыраах нэһилиэктэртэн эмиэ киирэн анаан-минээн сынньанан, бу ааспыт үс күҥҥэ чахчыта да кулууптан арахсыбакка сырыттылар, дууһалыын сынньаннылар, култуурунай олоҕунан олордулар. Артыыстары, биир дойдулаахтарбытын улуус баһылыга Степан Кузьмин тахсан эҕэрдэлээн сибэкки дьөрбөтүн туттаран, Эстрада тыйаатыра Амма улууһун кытта бииргэ үлэлиирин, өйүүрүн иһин махтанна.
Маннык үөрүүнү бэлэхтии сылдьар култуурабыт үлэһиттэригэр бүгүн Арассыыйа үрдүнэн бэлиэтэнэр Култуура үлэһиттэрин күнүнэн ис сүрэхтэн эҕэрдэлиибит!
“Амма олоҕо” хаһыат