Дьокуускай куоракка ыытыллыбыт «Олоҥхо дойдутун оҕотобун» өрөспүүбүлүкэтээҕи XXIX бэстибээлгэ А. А. Черемных аатынан оҕо ускуустубатын оскуолатын «Оллоон» оҕо көрдөрүүлээх бөлөх оҕолоро ситиһиилээхтик кытыннылар.
А.Е.Кулаковскай аатынан Норуоттар доҕордоһууларын дьиэтигэр XXIX төгүлүн ыытыллар «Олоҥхо дойдутун оҕотобун» бэстибээл олоҥхоһут П.П. Ядрихинскай — Бэдьээлэ 125 сылыгар ананан ыытылынна. Бэстибээл уһуйаан, оскуола оҕолорун ортолоругар олоҥхону олоҕурбут ньыманан бөлөҕүнэн уонна биирдиилээн толорууга, чинчийиигэ 29-с төгүлүн тэрээһиннээхтик буолан ааста. Ол курдук Амма, Таатта, Чурапчы, Уус Алдан, Мэҥэ Хаҥалас, Горнай, Нам, Бүлүү, Ньурба, Кэбээйи, Муома улуустарыттан олоҥхону толорор уонна чинчийэр оҕолор, уһуйааччылар барыта 305 оҕо бэрт сэргэхтик кэлэн кыттыыны ыллылар. Ол иһигэр, оскуола оҕолоругар — 36 – биирдиилээн толорооччу , 14 бөлөххө 120 оҕо, 12 оҕо чинчийэр үлэнэн, барыта 168 оскуола оҕолоро кытыннылар. Бэстибээлгэ үгэс быһыытынан олоҥхону толоруу утумун салҕааһыҥҥа, толоруу сатабылын, оҕо айар дьоҕурун сайыннарыыга уонна тарҕатыыга улахан суолта ууруллар. Бэстибээлгэ Амма улууһуттан А.А. Черемных аатынан оҕо ускуустубатыгар дьарыктанар “Оллоон” көрдөрүүлээх фольклорнай бөлөҕүн иитиллээччилэрэ ситиһиилээхтик кытыннылар. Ол курдук олоҥхоһут П.П. Ядрихинскай – Бэдьээлэ сиэнэ, Өлүөхүмэ улууһугар култуураҕа үлэлии сылдьар, айар куттаах, олоҥхо мецената Ларионова Мария Дмитриевна спонсордаан, 3000 солкуобайдаах сертификаты олоҥхону толорооччу А. А. Черемных аатынан оҕо ускуустубатын выпускницата Дьяконова Надежда тутан үөрдэ-көттө. Оҕо ускуустубатын оскуолатын 3-с кылааһын иитиллээччитэ Татаринова Айна “Истээччи биһирэбилэ” анал ааты ылла. Бөтүҥтэн “Оллоон” көрдөрүүлээх фольклор бөлөҕө 1 таһым буолан “Бастыҥ толорооччу” аат хаһаайыннара буоллулар. Бу баран кыттыыбытыгар күүс-көмө буолбут А. А. Черемных аатынан оҕо ускуустубатын оскуолатыгар уонна бэйэбит оскуолабыт салалтатыгар махтал тылларын тириэрдэбит.
Дарияна ЯКОВЛЕВА,
Бөтүҥ орто оскуолатын “Оллоон” бөлөх салайааччыта