Улуу Кыайыы 80 сылыгар анаан, Болугур нэһилиэгин бэтэрээннэрин Сэбиэтин «Кыайыы ыччаттара» бырайыагын чэрчитинэн Сырдык сиригэр нэһилиэк ыччаттарын икки ардыларыгар сэргэх тэрээһин ыытылынна.
Айылҕа чэлгийэн турар кэмигэр сарсыардаттан тэриллэн, Болугуртан 20 км сытар дириҥ, баай историялаах кулун атах култууратын мэҥэ тааһа, аҕа дойду улуу сэриитигэр барбыт биир дойдулаахтарбытыгар аналлаах «Сырдык сулус» өйдөбүнньүк бэлиэлэр турар, ытык Сырдык сиригэр тиийэн тэрээһиммитин ыыттыбыт. Сирбитигэр тиийэн алаадьынан күндүлээн тэрээһиммит үөрүүлээх аһыллыытын уонна өйдөбүнньүк бэлиэлэргэ сылдьан, Болугур нэһилиэгин баһылыга Андрей Петров, бэтэрээннэр Сэбиэттэрин бэрэссэдээтэлэ Надежда Кондакова, солбуйааччы Анастасия Никифорова, Сырдык кырдьаҕаһа Василий Григорьев уонна кыраайы үөрэтэр учууталбыт Анна Никифорова тэҥҥэ сылдьыһан, эҕэрдэ тыл этэн, ыччаттарга ытык Сырдык сирин историятын кэпсээтилэр.
Ыччаттар «Сырдык сулус» өйдөбүнньүк бэлиэҕэ харыйа олортулар.
Бу кэнниттэн Болугур нэһилиэгин ыччат кэмитиэтин исписэлииһэ Рустам Дьячковскай салайан, ыччаттарга өбүгэ оонньууларыгар күөн – күрэс ыытылынна. Кыргыттарга “Кириэс тэбии”, уолаттарга “Бөтүүктэһии”, хамаанданан сүүрүү, “Хардаҕас охторуута”, түү мээчиги ыаҕыйаҕа быраҕыы, сэрии кэмин историятыттан викторина, сыал ытыыта, байыаннай ырыа түһүмэхтэрэ буолла. Ол курдук ыччаттар «Өрөгөйдөр» уонна «Айылҕа оҕолоро» диэн хамаандаларга арахсан күрэхтэстилэр. Түмүккэ уопсай баалынан «Өрөгөй» хамаандата кыайыылаах таҕыста.
Ыччаттарга тэрээһин анал бэлиэлэрэ, норуот маастара Степан Устинов туойунан чороонноро, “Кулун атах култуурата. Сырдыктааҕы кэм” буклет туттарылынна. Нэһилиэкпит бэтэрээннэрин Сэбиэтэ уонна ыччаттара тэрийэн кутааҕа миин буһаран, олус минньигэстик эбиэттээтибит. Тэрийээччилэргэ махталбытын тиэрдэбит, бу курдук ыччаттарга сырдатыы, доҕордоһуу, түмсүү, чөл олоҕу тутуһуу тэрээһиннэр буола турдуннар.
Евдокия ПЛАТОНОВА