Арассыыйа худуоһунньуктарын айар Сойуустарын чилиэнэ Николай Рязанскай хартыыналарын быыстапката улуус нэһилиэктэрин олохтоохторун болҕомтотун тардар. Быыстапка Болугуртан саҕаланна.
Улуу Кыайыы 80 сылыгар аналлаах «Улуу Кыайыынан кынаттанан, эйэлээх олох суолунан» улуустааҕы тэрээһин чэрчитинэн Арассыыйа худуоһунньуктарын айар сойуустарын чилиэнэ, Амма улууһун уонна Сулҕаччы нэһилиэгин бочуоттаах олохтооҕо Николай Николаевич Рязанскай «Кустук тахсар Аммабар» быыстапката Амма улууһун нэһилиэктэринэн ыалдьыттыыр. Ол курдук сэтинньи 11 күнүгэр быыстапка Болугур нэһилиэгэр туран дьон сэҥээриитин ылла. Худуоһунньук кэлбит дьоҥҥо хартыыналарын туһунан бэрт сиһилии кэпсээн, хайдах туох хартыынатын быһаарар.
Худуоһунньуктуун алтыһан быыстапка кыттыылаахтара бэркэ астынан тарҕастылар. Манна быыстапка М.А. Ноговицын аатынан култуура киинигэр сэтинньи 17 күнүгэр диэри турар. Онтон салгыы сэтинньи 17 күнүгэр Алтан нэһилиэгэр тиийиэҕэ. Манна хартыыналары сэтинньи 24 күнүгэр диэри көрүөххэ сөп. Бу кэнниттэн худуоһунньук хартыыналарын Соморсун нэһилиэгин сабыс саҥа кулуубугар туруоруо. Олохтоохтор кэрэ, бэйэлэрэ туспа ис хоһоонноох хартыыналары кытта ахсынньы 1 күнүгэр диэри билсиэхтэрин сөп. Дьэ бу кэнниттэн быыстапка ахсынньы 1 күнүгэр Амма нэһилиэгэр аһыллыа. Улуус киинин олохтоохторо биир нэдиэлэ устата талааннаах худуоһунньук айан таһаарбыт хартыыналарын кэлэн көрөр кыахтаныахтара.
Жанна МАКСИМОВА