Аҕыйах хонуктааҕыта Амма Наахара олохтооҕо, өр сыл «Дуораанчык» уһуйааҥҥа иитээччинэн, онтон эбии үөрэхтээһин педагогунан үлэлээбит, билигин үһүс көлүөнэ оскуолатын салайааччыта, саха төрүт оонньууларын хабылык, хаамыска волонтера Нина Романовна кэргэнинээн Валерий Иванович Гаврильевтыын Элиэнэ очуостарыгар сынньанан кэллилэр. Бу сынньалаҥы Гаврильевтар 2024 сылга толору сурутуу түмүгэр оонньуу кыайыылаахтара буолан ситистилэр.
Нина Романовна 2023 сыл күһүн «Амма олоҕо» хаһыат толору суруппута. Улуус хаһыата сылга толору суруппут дьон ортотугар “Элиэнэ очуостарыгар” путевка оонньоппута. Дьэ онно соһуччу путевка хаһаайката буола түспүтэ. Киһи үөрэрэ диэн бэлэх эмиэ туспа долгутуулаах кэрэлээҕэ.
«Улууһум хаһыатын кыра эрдэхпиттэн сөбүлээн ааҕабын. Кэлин ыал ийэтэ да буолан баран хаһыаппар өрүү суруйтарабын. Путевканы мин сүүйбүппүн бииргэ үөрэммит дьүөгэм Анна Николаевна Стручкова ситим нөҥүө биллэрбитэ. Бастаан соһуйан хаалан хайдах эрэ турукка киирбитим. Дьэ онтон ылынан үөрүүм муҥура суоҕа. Хаһан барарбытын хата бэйэбит таларбытыттан олуһун астына истибитим. Күһүөрү арыый үлэ үмүөрүйбүтүн кэннэ өрүс пароходстватыгар киирэн бириэмэбин талбытым, итиэннэ балаҕан ыйын 4-6 чыыһылаларыгар Элиэнэ очуостарыгар устубуппут.
Бу туурга биһиги иккиэн саҥа сылдьыыбыт буолар. Тэрээһин олус астык! “Михаил Светлов” диэн уу аалыгар барыта 200 киһи олорсон Сахабыт сирин биир кэрэ миэстэтин көрө туруммуппут. Хата күн туран биэрэн дойдубут кэрэтин харахпыт арахпакка көрдүбүт. Каютабыт икки миэстэлээх, толору хааччыллыылаах буолан бэркэ сынньанныбыт.
Манна киинэ көрдөрөр, сынньанар үҥкүүлүүр сирдэр бааллара, эдэр дьон болҕомтотун олус тардар эбит. Аны аһыыр сирдэригэр астарын арааһа, эчи элбэҕэ сөхтөрдө. Элиэнэ очуостарыгар тахсыах иннинэ Алгысчыт Аанаттан алгыс туттубут. Балтараа кэлимиэтэри сатыы хааман тахсан икки сүүс миэтэрэ үрдүктээх хайаттан Элиэнэ эбэбитин илэ көрдүбүт, астынныбыт. Бу туурга Ньурбаттан, Амматтан, Хаҥаластан, Маҕантан, Кэбээйиттэн о.д.а. Сахабыт сирин араас муннугуттан бааллара.
Дьоллоох сүүйүүбүн билэн, долгуйан, номнуо ахта санаан олоробун. Сөбүлүүр хаһыаппын биир да сирэйин көтүппэккэ ааҕабын. Хаһыаттан сонуннары тута ааҕааччыбын. Кырдьаҕас да дьоҥҥо, эдэр да ыччакка сыһыаннаах барыта тахсар. Тыа хаһаайыстыбатын, үөрэхтээһини, айар дьоннору олус сөбүлээн ааҕабын. Хаһыаппын почтаттан баран ылабын. Кэлин электроннай ыстатыйалары көтүппэккэ ааҕабын, ордук табыгастаах эбит. Сахалыы кинигэлэри ааҕан бөҕө буоллаҕа! Сардаана Корякина «Күтүөккэ хомолто» кэпсээнин биир тыынынан олус сөбүлээн аахпытым. Сахалыы сиэри-туому, айылҕа, дьон сыһыаннарын туһунан интириэһиргиибин. Олохпутугар дьикти түгэннэри бэлэхтээбит «Амма олоҕо» хаһыаппар махтал мааны тылын аныыбын, сүрэхтэн тахсар сөҕүмэр сайаҕас эҕэрдэ иэйиибин ыытабын.Кырдьаҕас эйэлээх кэлэктиип симэлийэн хаалбакка өссө сайда, чэчирии турдун. Улууспут бары олохтоохторун хаһыакка сурутаргытыгар ыҥырабын”, — диэн Нина Романовна санаатын үллэһиннэ.
Ирина КОРЯКИНА-ОЛЕСОВА