Н.Е. Иванов аатынан Бөтүҥ орто агрооскуолатыгар көмүс күһүнү атааран атыы-эргиэн дьаарбаҥката үрдүк таһымҥа ааста. Оскуола үөрэнээччилэрэ уонна төрөппүттэрэ көхтөөх кыттыыны ыллылар. Тэрээһинтэн киирбит үптэн Бөтүҥтэн төрүттээх Амма 2№-дээх оскуолатын үөрэнээччитигэр Люба Никитина эмтэнэригэр ыытылынна.
Күһүҥҥү дьаарбаҥка үөрүүлээх чааһын 11 кылаас үөрэнээччилэрэ Аэлита Кулаковская уонна Харысхан Филатов иилээн-саҕалаан ыыттылар. Буоларын курдук, дьаарбаҥкаҕа оҕуруот аһын кэнсиэрбэтиттэн саҕалаан, минньигэс ас эгэлгэтэ, бурдук аһын арааһа, кус миинин соҕотуопкатыгар тиийэ, уран илиинэн оҥоһуктар, бизнес-инкубатор оҕолорун оҥоһуктара уонна да атын элбэх атыыга хамаҕатык атыыланна.
Ону тэҥэ, хас кылаас аайыттан айылҕа матырыйаалыттан авангард муода, уруһуй, оҥоһук быыстапка уонна ураты оҕуруот аһыгар күрэхтэр буоллулар. Дьүүллүүр сүбэ тэрээһини үрдүктүк сыаналаата, бары олус бэлэмнээхтэрин бэлиэтээтэ.
Оттон, нэһилиэкпит олохтоохторо кэлэн сэргэхсийэн, көрөн-истэн, атыылаһан астынан бардылар. Сылын аайы сылдьар, өйүүр дьоннор эмиэ бааллар. Кинилэр оҕолорго баҕа санааларын эттилэр, тэҥҥэ үөрүүлэрин үллэһиннилэр. Ааспыт сайын оскуолабытыгар түөрт хайысхалаах үлэ этэрээттэрэ тэриллэн үлэлээбит оҕолорго дириэктэрбит Акулина Семеновна Иванова махтал суруктары үөрүүлээх быһыыга туттарда. Сайын устата оҕолор оскуолабыт тэлгэһэтигэр яблоня үнүгэстэрин олортулар, таас кирпииччэлэри тастылар, оҕуруот үлэтигэр көмөлөстүлэр, олоҥхо ыһыаҕар анаан Анисия Даниловна Софронова аатынан сайыҥҥы олоҥхо балаҕан быһыылаах тутуу оҥоһуутугар көмөлөстүлэр. Билигин даҕаны, этэрээт көхтөөх оҕолоро күһүҥҥү бурдук хомууругар көмөлөһөн үлэлии сылдьаллар. Тэрээһиҥҥэ киирбит үп сорҕотун, биһиги Бөтүҥнэр биир дойдулаахпытыгар, Амма 2 №-дээх орто оскуолатын 7 кылаас үөрэнээччитигэр Никитина Любаҕа көмө быһыытынан ыытабыт.
Бүгүҥҥү кыттыылаахтарга тэрийээччилэр ааттарыттан махталларын тиэрдэллэр. Куруутун ситиһии сиэттистин, үөрүү үксээтин! Түмсүүлээх, көхтөөх буолуоҕуҥ!
Сайнаара СЕРГЕЕВА, Юрьяна ГУРЬЕВА, Бөтүҥ орто оскуолатын үөрэнээччилэрэ, медиакиин чилиэннэрэ