Бүгүн ытыктыыр биир дойдулаахпыт, РФ култууратын үтүөлээх үлэһитэ, ССРС телевидениетин уонна араадьыйатын туйгуна, Емельян Ярославскай аатынан бириэмийэ лауреата, Саха телевидениета сайдыытыгар ураты кылааттаах, Амма улууһун бочуотттаах гражданина Елена Миронова баара буоллар 90 сааһын томточчу туолуо этэ. Бүгүн талааннаах суруналыыһы “Саха” НКИК ханаалыгар киэһэ 19 чаас 15 мүнүүтэҕэ “Талбан” биэриигэ ахтан санаан ааһыахтара.
“Елена Степановна Миронова биһиги сахабыт телевидениетин албан ааттаах сулуһа, телевидение сайдыытыгар улахан кылааттаах киһи. Мин тус бэйэм кинини кытта ыкса алтыһан үлэлээбит дьоллоох киһибин. Елена Степановнаны “телевизионнай эбэм” диэн ытыктаан ааттыыбын. Биһиги кинини кытта биир кабинекка олорон эбэлээх сиэн курдук олус тапсан үлэлээбиппит. Кини миигин да сиэним диирэ. Өссө устудьуоннуу сылдьыахпыттан, дипломнай үлэбин суруйарбар ыкса алтыспытым. Кини сүбэтэ-амата, суруйбут кинигэтэ дипломмун суруйарбар олус көмөлөөх буолбуттара. Онон Елена Степановна мин идэбин ыларбар, үлэһит буоларбар улахан өҥөлөөх киһи. Аны үөрэхпин бүтэрэн үлэлии киирэн баран иккиэн биир кабинекка үөһээ этээскэ олорбуппут. Онно дьэ эбээ, сиэн буолан наһаа да үчүгэйдик айымньылаахтык үлэлээбиппит. Кини онно олорон оҕо сааһын сылаастык ахтара. Ол кэпсээнтэн биир түгэни өйдөөн хаалбыппын. Ол курдук Елена Степановна хараҕа суох эбэлээх эбит. Ол эбэтэ биирдэ сайын ааттаах эрдэ уһугуннаран ынах ыы тахсыбыттара, олох эрдэ, түүн 2 чаас эбит. Оннук түгэннэрдээх эбит, чаһыны билбэккэ эрдэ тураллара. Сайын буолан атах сыгынньах сылдьар этибит диирэ. Онно сарсыарда сииктээх буолан атахтара тоҥоллор эбит. Ону ынах сааҕыгар уган иттэр буоларбыт диэн кэпсиирэ. Оҕо сааһын, эбэтин туһунан хайдах эрэ ураты истиҥник ахтар эбитин бу билигин өйдүүбүн. Дьиэтигэр элбэхтэ сылдьыбытым, чэйдээбитим. Елена Степановна фирменнэй бүлүүдэтэ – балык бөрүөгэ этэ. Дьэ ол бөрүөгүн амсайан, элбэҕи кэпсэтэн, чахчы да эбэбэр курдук кини дьиэтигэр, даачатыгар ыалдьыттаабытым.
Кини хаһан да үөрэтэ, этэ сылдьыбат буолара. Хайдах эрэ бэйэтэ тутта-хапта сылдьарыттан, кэпсээниттэн киһи элбэххэ үөрэнэрэ. Елена Степановна биһиги норуодунай суруйааччыларбыт, худуоһунньуктарбыт, туох баар бас-көс дьоммут ыллыктаах тылларын устан үйэтитэн хаалларбыт өҥөлөөх. Кинини кытта “бастакы” диэн тыл кытта олус элбэхтэ дьүөрэлэһэр. Ол курдук Саха судаарыстыбаннай университетын бастакы выпускнига буолар, саха телевидениетыгар бырайыактары, биэриилэри бастакынан саҕалаабыта, норуодунай суруйааччылары кытта бастакынан кэпсэппитэ… Итинник кини инники күөҥҥэ сылдьар киһи. Елена Степановна 80 сааһын үөрэн-көтөн бэлиэтээн турабыт. Кини онно олох барыбытыгар, саҥа саҕалааччы суруналыыстарга да, салайааччыларбытыгар да, эдэриттэн эмэнигэр тиийэ үтүө сүбэһит этэ. Мин үөрэхпин бүтэрэн баран иннибэр улахан талыы турбута. Ол эбэтэр Саха көрдөрөр-иһитиннэрэр хампаанньатыгар киирэбин дуу, эбэтэр ВГТРК-ҕа дуу диэн. Онно Елена Степановна чопчу онно киир диэн эппэтэр даҕаны, Саха телевидениетэ хайдах сайдар саҕахтааҕын этэн кэбиһэн дуу, мин манна күн бүгүнүгэр диэри үлэлии-хамныы сылдьабын. Онон Елена Степановнаҕа наһаа улахан махталлаахпын. Билигин ытык киһибит баара буоллар бүгүн 90 сааһын бэлиэтиэ эбиппит. Ол гынан баран кини биһиги аттыбытыгар суоҕун да иһин, устан хаалларбыт биэриилэрэ, биһигини элбэххэ үөрэтэр, угуйар, ыҥырар.Кини биэриилэрин көрө-көрөбүт кэпсэтии жанра курдук уустук жанрга баччааҥҥа диэри өссө да үөрэнэбит. Кэм кэрдии, сыл-хонук аастаҕын аайы биһиги атыннык көрөбүт уонна атыҥҥа, саҥаҕа үөрэнэн иһэбит”, — диэн “Саха” НКИК дириэктэрэ Олег Колесов санаатын үллэһиннэ.
“Амма олоҕо” хаһыат