«Олимп» күнүскү оҕону чэбдигирдэр-спортивнай лааҕырга бэс ыйыгар бастакы сезоҥҥа 275 оҕо сылдьан эт-хаан өттүнэн чэбдигирэн, эрчиллэн, араас тэрээһиннэргэ кыттан доруобуйаларын тупсаран тарҕастылар.
Көҥүл тустуу, волейбол, сүүрүү, мас-тардыһыы, дуобат, хайыһар, остуол тенниһэ, оҕунан ытыы курдук спорт көрүҥнэригэр оҕолор суруйтаран сырыттылар. Күннэтэ тренердэр дьарыктаатылар, практикаларын ааһар устудьуоннар Иннокентий Варламов, Айаана Мартынова тэрээһиннэргэ күүс-көмө буоллулар.
Истиэнэ хаһыатын куонкурсугар оҕолор бэйэлэрин дьарыктанар көрүҥнэрин уонна спорт туһатын туһунан хаһыатынан көмүскээтилэр, биир да майгыннаспат көрүүлээх, олус интэриэһинэй ис хоһоонноох буолан тахсыбыттар.
Спортсмен оҕолор дойдуларыгар бэриниилээх буоларга иитиллэн тахсыылара — бу иитии биир сүрүн көрүҥэ. Лааҕыр үөруулээх сабыллыытыгар 275 оҕо стадион устун маршынан парадтаан киирэн, бары биир киһи курдук Амма улууһун гимнин ыллаабыттара олус долгутуулаах түгэн буолла.
Оскуола дириэктэрэ Дмитрий Петрович Неустроев тыл этэн, барыларыгар туһалаах сайыны баҕарда, лааҕыр начальнига Ангелина Константиновна көрүҥнэринэн көрүү түмүктэринэн наҕараадалаата, уопсай оонньооһун кэнниттэн саха итэҕэлин киллэрэн, оҕолору алгыстаан тустуу тренерэ Сырдык Айылгын Бойуот уола Алгыс оһуокайын этэн, 4 төгүл эргимтэлээх оһуокай стадиоҥҥа дьиэрэйдэ.
Онтон от ыйын 6 күнүттэн Амматааҕы оҕо спортивнай оскуолата Амма өрүс үрдүгэр турар «Олимп» оҕону чэбдигирдэр-спортивнай лааҕырыгар стационарнай сезоҥҥҥа 80 оҕону хабан сэргэх былааннаах үлэтин саҕалыа.
Онтон атырдьах ыйыгар үрдүк ситиһиилээх оҕолорго үөрэтэр-дьарыктыыр сбордары ыытыаҕа. Бу курдук Амматааҕы оҕо спортивнай оскуолатын коллектива чөл, спорду өрө тутар, доруобай көлүөнэни таһаарар туһугар сынньалаҥы, өрөбүлү билбэккэ бэриниилээхтик үлэлиир.
Виктория Владимирова.