Бүгүн, алтынньы 28 күнүгэр, биһиги биир дойдулаахпыт, Саха сирин биллэр судаарыстыбаннай уонна уопсастыбаннай диэйэтэлэ, Амма улууһун Бочуоттаах гражданина Светлана Ефимовна Николаева төрөөбүтэ 85 сылын туолла.
Светлана Ефимовна Николаева 1941 сыллаахха алтынньы 28 күнүгэр Дьокуускай куоракка сулууспалаахтар дьиэ кэргэттэригэр төрөөбүтэ. Аҕата, Ефим Петрович, үөрэхтээх, улахан билиилээх-көрүүлээх киһи этэ. Билигин кини аатын Бөтүҥ нэһилиэгин биир улахан уулуссата сүгэр. Ийэтэ, Александра Иннокентьевна, бэрт муударай, амарах дууһалаах киһи этэ. Николаевтар дьиэ кэргэннэригэр дьоҥҥо ытыктабылы уонна билиигэ тардыһыыны сыаналыыллара, өрө туталлара.
Светлана Ефимовна 1967 сыллаахха Саха судаарыстыбаннай университетын бүтэрбитэ. Үлэтин Амма орто оскуолатыгар математика учууталынан саҕалаабыта. Салгыы хомсомуол уонна баартыйа үлэтигэр кэлбитэ: Амма оройуонун хомсомуолун бастакы сэкирэтээрэ, Саха обкомун хомсомуолун сэкирэтээрэ, Мирнэйдээҕи горком баартыйатын сэкирэтээрэ. Кини 1982 сыллаахха ССКП КК иһинэн Уопсастыбаннай наука академиятын бүтэрбитэ. 1986 сылтан 1990 сылга диэри Саха АССР Култууратын миниистиринэн үлэлээбитэ. Бу сылларга култуура тэрилтэлэрэ бөҕөргөөбүттэрэ, идэлээх үөрэхтээһин сайдыбыта уонна өрөспүүбүлүкэҕэ култуура бастакы үрдүк үөрэҕин тэрийии туһунан кэпсэтии барбыта. Бибилэтиэкэлэргэ литературнай гостинайдар баар буолбуттара, түмэл салааларын ситимэ кэҥээбитэ, онтон нэһилиэктэргэ кыра түмэллэр арыллыбыттара.
1990-с сылларга кини Дьарыктаах буолууга, үлэҕэ уонна нэһилиэнньэни социальнай харыстааһыҥҥа миниистири солбуйааччынан үлэлээбитэ, итиэннэ Дьиэ кэргэни, ийэ буолууну уонна оҕо сааһы өйүүр пуонда дириэктэринэн буолбута. Светлана Ефимовна 30-тан тахса сыл дьахтар хамсааһынын бэриниилээх лиидэринэн буолбута: 1991 сыллаахха Өрөспүүбүлүкэтээҕи дьахтар сэбиэтин салайбыта, 1995–2001 сылларга — Өрөспүүбүлүкэ дьахталларын тэрилтэлэрин сойууһун бэрэссэдээтэлэ, 2001 сылтан — кини Бочуоттаах бэрэссэдээтэлэ. 2011 сылтан СӨ Уопсастыбаннай палаатын чилиэнэ этэ.
Таһаарыылаах, айымньылаах уонна бэриниилээх үлэтэ үрдүктүк сыаналанан, Светлана Ефимовна «Бочуот бэлиэтэ» уордьанынан, «Үлэҕэ хорсунун иһин» мэтээлинэн, Софья Сидорова аатынан Бочуоттаах бэлиэнэн, Монголия «Найрамдал» мэтээлинэн уонна Арассыыйа Дьахталларын сойууһун өйдөбүнньүк мэтээлинэн наҕараадаламмыта. Кини Саха Өрөспүүбүлүкэтин норуотун хаһаайыстыбатын үтүөлээх үлэһитэ уонна социальнай сулууспатын туйгуна. 2013 сыллаахха киниэхэ Амма улууһун Бочуоттаах гражданина аат иҥэриллибитэ.
Светлана Ефимовна дьоҥҥо тапталынан уонна үлэҕэ эппиэтинэһинэн Саха сирин сайдыытыгар сүҥкэн кылааты киллэрсибит дьоннортон биирдэстэрэ. Бөтүҥ нэһилиэгэр Ийэ искибиэрэ арыллан, киэн туттар киһибит аатын сүгэр. Светлана Ефимовна аатын биир дойдулаахтара умнубаттар, куруутун сылаас тылынан ахталлар. Бу бэлиэ күҥҥэ С.Я. Левин аатынан «Норуот айымньытын киинэ» Марианна Кырбасова салайааччылаах «Эйгэ» биэрии чэрчитинэн Светлана Ефимовна туһунан видеосюжет бэлэмнээбитин, эһиги бу сигэнэн киирэн көрүөххүтүн сөп.
Айталина ИВАНОВА, кулууп иһинэн үлэлиир хайысхалар салайааччылара