Бүгүн алтынньы 28 күнүгэр биир дойдулаахпыт, биллиилээх уопсастыбаннай-судаарыстыбаннай деятель Светлана Ефимова төрөөбүтэ 85 сылын туолла. Бу бэлиэ күнүнэн сарсыарда “Тэтим” саха араадьыйатын “Сиһилии” диэн биэриитигэр кини туһунан бэртээхэй кэпсэтии таҕыста. Бу туһунан биэрии ааптара, СӨ култууратын үтүөлээх үлэһитэ, СӨ араадьыйатын уонна тэлэбиидэнньэтин туйгуна Альбина Тарабукина сырдатар.
“Бу биэриибитигэр Светлана Ефимовна Николаева олоҕун, Саха өрөспүүбүлүкэтин сайдыытыгар киллэрсибит кылаата сырдатыллынна. Биэриибит ыалдьыттарынан кинини кытта бииргэ алтыһан үлэлээн ааспыт биллиилээх судаарыстыбаннай-уопсастыбаннай деятеллэр Валентина Ивановна Кириллина, Анастасия Николаевна Божедонова уонна дьиэ кэргэнин аатыттан кийиитэ Людмила Ивановна Попова буоллулар. Биэриигэ Светлана Ефимовна оҕо сааһыттан саҕалаан, бу олохтон барыар диэри олоххо сыһыана, өрөспүүбүлүкэ, уопсастыба сайдыытыгар киллэрбит кылаатын тула кэпсэттибит. Ол курдук мин, Светлана Ефимовна дьон туһугар үлэ, дьонтон тугу да эрэйбэккэ, ис сүрэхтэн кыһаллан үлэлээтэххэ, үлэҥ үтүө түмүктэри аҕалар диэн олус муударай этиитин сөҕө да, астына да ылыммытым. Кини киһи быһыытынан холкутун, дьоҥҥо үтүө сыһыанын уонна олоххо мындыр сыһыанын бэйэм урут кинилэри кытта бииргэ алтыһан үлэлэспит да киһи быһыытынан куруутун улаханнык сыаналыыбын. Биэриибитигэр араадьыйанан истээччилэргэ анаан Светлана Ефимовна бэйэтин этиитэ уһуллан хаалбытын туһанныбыт. Ол курдук 25 сыл аннараа өртүгэр фондаҕа киирбит биэрииттэн үс түһүмэххэ арааран иһиттибит. Манна кини олоҕун суолугар тирэх буолбут комсомол, баартыйа суолталааҕын бэлиэтээбит. Үлэни сүгэһэр курдук ылыммакка, эппиэтинэс курдук ылынар үөрүйэҕин, олоххо үс ханнык сүрүн тутулу тутуһуохтааҕын туһунан эппит көмүс куолаһын иһитиннэрдибит. Биэрии кэмигэр Светлана Ефимовна араас кэмнэргэ үлэлээн ааспыт түгэннэриттэн хаартыскалар көстөн аастылар. Анастасия Николаевна кинини салайааччы быһыытынан үрдүктүк сыаналаабыт этиитэ истээччилэргэ уонна көрөөччүлэргэ киэҥ ис хоһоонноохтук билиһиннэрдэ. Валентина Ивановна Саха сирин дьахталларын Сэбиэтин үлэтин тэрийиигэ сүҥкэн кылаатын уонна оччолорго өрөспүүбүлүкэ култуураҕа миниистиринэн, социальнай харысхал миниистирин солбуйааччытынан үлэлии сылдьан киллэрбит кылаатын эмиэ сиһилии кэпсээтэ. Маны сэргэ Светлана Ефимовна куруутун дьон туһугар олорон кэлбитин уонна киһи быһыытынан амарах санаатын, кырдьыксытын, үлэҕэ бэриниитин туһунан устуудьуйа ыалдьыттара кэпсээтилэр. Кийиитэ Людмила Ивановна Попова ийэлэрэ олохтон барбытын кэнниттэн санаан көрдөххө, наһаа да муударай санаалаах, хаһан да үөрэтэн-такайан буолбакка, бэйэтин холобурунан үөрэппит эбит диэн бэлиэтээтэ. Кини тапталлаах бастакы сиэнин Оливияны бэйэтэ көрөн, үөрэттэрэн, “үтүө киһи буол” диэн куруутун сүбэлээн, үөрэтэн улаатыннарбыт. Билигин Оливия Санкт Петербург куоракка наһаа үчүгэйдик роботехника хайысхатынан үөрэнэ сылдьар эбит. Түмүкпүтүгэр Светлана Ефимовна олорбут олоҕо үйэтитиллиитин туһунан кэпсээтилэр. Ол курдук Валентина Ивановна көҕүлээһининэн хас да кинигэ тахсыбытын, “Айар” кинигэ кыһатын “Саха сирин биллиилээх дьоно” сериятыгар Светлана Ефимовна Николаева туһунан кинигэ тахсыбытын, олорбут дьиэтигэр мэҥэ бэлиэ турбутун кэпсээтилэр. Бүгүн кини төрөөбүтэ 85 сылыгар аналлаах уопсастыбаннас кыттыылаах улахан мунньах ыытыллан, үтүө киһи туһунан кэпсэтиэхтэрэ”, — диэн Альбина Афанасьевна санаатын үллэһиннэ.
“Амма олоҕо” хаһыат