Алтан орто оскуолатын физкультураҕа учуутала, сүүрүүнэн дьарыгырар спортсменка Марфа Дьячковская бу күннэргэ 2024 сыл атырдьах ыйын 10 күнүгэр Париж куоракка ыытыллыахтаах Олимпийскай оонньууларга кыттарга анал ыҥырыы суругу тутта. Бу туһунан сиһилии Марфаны кытары сибээскэ тахса сырыттыбыт.
Ханнык баҕарар киһи сөбүлүүр дьарыгын адьас кыра эрдэҕиттэн саҕалыыр үгэстээх. Ол оннук үгэһи кыра сааһыттан күн бүгүнүгэр диэри илдьэ сылдьар киһинэн биирдэстэрэ Марфа Дьячковская буолар. Кини сүүрүүнэн оҕо сааһыттан күүскэ дьарыктанан барбыта. Спортка тапталын салгыы сайыннарар санаалаах кыыс 2007 сыллаахха Дьокуускайдааҕы 1№ дээх оҕо спортивнай оскуолатын үөрэнэн бүтэрбитэ. Салгыы спорду идэ оҥостор баҕалаах М.К. Аммосов аатынан ХИФУ физическай культураҕа уонна спорка институтугар киирэн үөрэнэн 2012 сыллаахха бүтэрэн, чэпчэки атлетиканы үөрэтэр учуутал идэтин ылбыта. Устудьуоннуу сылдьан Марфа кылгас даҕаны, орто даҕаны дистанцияларга сүүрэрэ. Өрөспүүбүлүкэҕэ ыытыллар улахан күрэхтэһиилэргэ өрүү ситиһиилээхтик кыттан миэстэлэһээччи. Оттон үөрэх кыһатын бүтэрэн баран сүүрүүгэ дьарыгын тохтоппута. Онтон Амма улууһун Алтан нэһилиэгэр ыал буолан олоҕун оҥостон баран, бу тиһигин быспакка саҥалыы тыыннаабыта. Ол курдук, сүүрүүнү кыраттан саҕалаан дьарыктанан, эрчиллэн сайыннаран баран, улуус сборнайыгар киирэн күрэхтэһэрэ. Ону ааһан Амма спорткомитетын көмөтүнэн ыраах соҕуруу сбордарга барар чиэскэ тиксибитэ. Ааспыт 2022 сыллаахха улуус көмөтүнэн Кисловодскай куоракка сборга бара сылдьыбыта. Салгыы Сочи куоракка тиийэн 5км сүүрэн кыттыбыта. Уус-Алдан Бороҕонугар ыытыллыбыт Саха норуотун спортивнай оонньууларыгар эмиэ актыыбынай кыттыыны ылбыта. Оттон быйыл Кыргызстан өрөспүүбүлүкэтигэр Чолпон-Атаҕа ыытыллыбыт сборга эмиэ кыттан кэлбитэ.
Инники кэскиллээх спортсменка Марфа Дьячковская улууһун чиэһин бэрт чаҕылхайдык көмүскээччи киһинэн буолар. Бу кэнники атын тас дойдуга Парижка буолуохтаах олимпиадаҕа профессионаллартан ураты, любительскай марафон буоларын билэн слот (право на участие) эккирэтэн саҕалаабыта. Онно икки сыл дьарыктанан, эккирэтэн ситиһии үөрүүтүн ылла. Кини аҕыйах хонуктааҕыта ыҥырыы суругу тутта. Слот туһунан быһаардахха субу курдук. Аан дойду үрдүнэн 20024 слот көрүллэрэ биллэр. Онно бүгүҥҥү күҥҥэ 665451 ылыан баҕалаах сүүрүк баар, өссө даҕаны эбиллэ тураллар. Слот бу сылынан түҥэтиллэн бүтүөхтээх. Сүүрүк кыыспытыгар Марфаҕа, Париж куоракка ыытыллар сүүрүүгэ ситиһиилээхтик кыттарыгар баҕарабыт.
Артем ОСИПОВ
