Н.Е.Иванов аатынан Бөтүҥ орто агро оскуолатыгар ситиһиилээх оҕолору, учууталлары, төрөппүттэри бэлиэтиир «Плеяда звезд — 2025» тэрээһин буолла. Быйылгы анал ааттары кимнээх ааттаннылар?
Үөрэххэ ситиһиилээх, кылаас, оскуола олоҕор уонна араас таһымнарга ситиһиилээхтик, көхтөөхтүк кыттыы, түмсүүлээх буолуу, араас хайысхаларынан ситиһиилээх талааннаах оҕолору бэлиэтээн, ааттарын ааттаан үрдүк сыанаҕа таһааран эҕэрдэлээтилэр, бириэмийэ туттардылар. Үөрүүлээх түгэни оскуола 11 кылааһын туйгун үөрэнээччитэ Селена Чирикова уонна көхтөөх кыттааччыта Эрнест Дьяконов иилээн-саҕалаан арыйдылар. Оскуолабыт дириэктэрэ Акулина Иванова мустубут ыалдьыттары, оҕолору уонна төрөппүттэри эҕэрдэлээтэ.
2024-2025 үөрэх сылын түмүгүнэн «Дебют года-2025» анал ааты култуура хайысхатыгар өрөспүүбүлүкэҕэ үрдүк ситиһиилэрин иһин 4 кылаас үөрэнээччитигэр Альберт Романов, «Успех года-2025» анал ааты араас хайысхаҕа барытыгар көхтөөх көрдөрүүлээҕин уонна ситиһиилээҕин иһин 8 кылаас үөрэнээччитэ Айдын Иванов, «Победитель олимпиад-2025» анал ааты 2 кылаас үөрэнээччитэ Айсаар Иванов, 5 кылаас үөрэнээччитэ Прокопий Егоров уонна улахан 10 кылаас үөрэнээччитэ Дархан Слепцов, научнай-практическай кэмпириэнсийэлэргэ өрөспүүбүлүкэ, Арассыыйа таһымыгар ситиһилэнэн «Исследователь года-2025» анал ааты 4 кылаас үөрэнээччитэ Маша Павлова, 6 кылаас үөрэнээччитэ Кира Эверстова уонна 9 кылаас үөрэнээччитэ Ньургустаана Окоемова, «Лучший в техническом творчестве» анал ааты 4 кылаас үөрэнээччитэ Мариела Жиркова, 8 кылаас үөрэнээччитэ Настя Назарова уонна 9 кылаас үөрэнээччитэ Дарина Непомнящая, «Лучший спортсмен» анал ааты 3 кылаас үөрэнээччитэ Өркөн Арылхан, 6 кылаас үөрэнээччитэ Даниил Попов, 10 кылаас үөрэнээччитэ Максим Птицын, «Культура» анал ааты 4 кылаас үөрэнээччитэ Андрей Артемьев, 7 кылаас үөрэнээччитэ Айсена Борисова уонна 10 кылаас үөрэнээччитэ Лена Степанова ыллылар. Маны сэргэ сыл устата айар үлэтэ бастыҥ буолбут «Лучший творческий коллектив» ааты 4 кылаас кэлэктиибэ (кылаас салайааччыта Марта Дьяконова) сүктэ. Учууталлар ортолоругар «Учитель ученических признаний» анал ааты омук тылын учуутала Ида Степанова ылла. «Лучший староста» анал аат 6 кылаас үөрэнээччитэ Сайаана Мартыноваҕа, «Активный родитель» анал аат төрөппүт Марианна Кырбасоваҕа, Лия Барановаҕа, Илья Дьячковскайга, Спартак Васильевка, Ньургуйаана Осиповаҕа, Петр Егоровка, Александр Адамовка, Петр Марковка, Милена Рязанскаяҕа, 1 Мавра Шишлянниковаҕа уонна Елена Никитинаҕа иҥэрилиннэ. Онтон «Лучший председатель Совета родителей» анал ааты 1 кылаас төрөппүтэ Марианна Кырбасова ылла. Маны таһынан Амма улууһун муниципальнай архыыбын салайааччыта Катерина Окорокова наука дьоҕус академиятын чилиэн-кэрэспэдьиэнин аатын сүкпүт 5 кылаас үөрэнээччитигэр Айыллаан Лазаревка анал бириэмийэни туттарда. Үгэс быһыытынан ситиһиилэммит үөрэнээччилэри уонна төрөппүттэри өйөөн, сылын ахсын оскуола педагогтара бириэмийэ олохтооһунугар күүс-көмө буолалларыгар махтал бастыҥын тиэрдэбит.
Ситиһиилээх оҕолор саҥа тахсыбыт сулустары ырыанан-тойугунан, үҥкүүнэн эҕэрдэлээтилэр, үөрүүлээх тэрээһини киэргэттилэр. Түмүккэ оҕолор бырааһынньыктааҕы туорду астына тото-хана амсайдылар.
Василина БОРИСОВА, педагог-бибилэтиэкэр