Амма улууһун “Амарах сүрэх” уопсастыбаннай түмсүү салайааччыта Римма Алексеева иһитиннэрбитинэн, олохтоохтор көмөлөрүнэн хомуллубут эмп-том, таҥас-сап, харысхаллар уонна өрүллүбүт харыстанар сиэккэлэр түмүллэн 10 баһыылканы Дьокуускай куоракка биир кэлим коллкииҥҥэ илдьэн туттарбыттар.
“Биһиги уопсайа 25 баһыылканы хомуйдубут. Бэҕэһээ 10 баһыылканы ыыттыбыт. Баһыылкаларбытын биир кэлим коллкиин сотруднига Алексей Васильевич Федоров туппута. Ол курдук улуус олохтоохторо, кэрэ аҥардара өрбүт 30-36 кв миэтэрэ иэннээх харыстанар сиэккэлэр, араас наадалаах эмп-томп, таҥас-сап хомуллунна.
Өссө ону таһынан бу баһыылкаларбытыгар Амма Наахара, Эмис уонна Амма 2№-дээх орто оскуолаларын үөрэнээччилэрэ бэлэмнээбит харысхалларын уктубут.
Кинилэр биһиги саллааттарбытыгар күүстэригэр күүс угуохтара, харыстыахтара диэн эрэнэбит. Онон бу оскуолалар кэлэктииптэригэр, үөрэнээччилэргэ махтанабыт. Баһыылкаларбытын хаһан да буоларын курдук “Элита” сулууспа таксита илтэ. Амматааҕы диспетчер Екатерина Егоровна Баишева барытын быһааран, суоппар Александр Мордовскай багажнигар тиэйбитэ. Суолга кыһалҕалар үөскээн, баһыылкалары Аллараа Бэстээххэ сүөкүүр наада буолбутугар биир дойдулаахпыт, хаһан да биһиэхэ аккаастаабакка куруутун күүс-көмө буолар Руслан Еремеевич Федотов бу да сырыыга көмөҕө кэлбитэ.
Онон кинилэргэ бука барыларыгар түмсүү аатыттан махталбытын этэбит. Маннык өйөбүллээх буолан, уолаттарбыт хайаатар да кыайыы көтөллөөх этэҥҥэ эргиллиэхтэрэ”, — диэн “Амарах сүрэх” түмсүү салайааччыта Римма Алексеева сырдатта.
Манна даҕатан эттэххэ, түөлбэлэринэн, нэһилиэктэринэн сиэккэ өрүүтэ салҕанар. Үлэ күннэригэр ким сололоох кэлэн бу анал байыаннай дьайыыга сылдьар биир дойдулаахтарбытыгар улахан көмүскэл буолар сиэккэни өрүүгэ кыттыһаргытыгар ыҥырабыт.
“Амма олоҕо” хаһыат