Бүгүн Аммаҕа СӨ уопсастыбаннай палатата кэлэн үлэлээтэ. Көрсүһүү мунньаҕын СӨ уопсастыбаннай палататын култуураҕа, СМИ-гэ уонна духуобунай нэһилиэстибэҕэ кэмитиэтин бэрэссэдээтэлэ Анастасия Самсонова салайан ыытта.
Бэбиэскэҕэ икки боппуруос көрүлүннэ. Ол курдук икки сыллааҕыта саҥардыллан тутуллубут “Саһыл Сыһыы” мемориальнай комплексы Е. Ярославскай аатынан Дьокуускайдааҕы хотугу норуоттар историяларын уонна култуураларын судаарыстыбаннай холбоһуктаах түмэлигэр филиал быһыытынан биэрэн, анал штат көрүллэрин туруорсуу уонна улуустааҕы түмэлгэ Василий Константинович Расторгуев аатын төннөрүү туһунан боппуруостары тула киэҥ кэпсэтии буолла. Манна улуус дьокутааттарын Сэбиэтин бэрэссэдээтэлэ Владимир Колосов, баһылыгы социальнай боппуруоска солбуйааччы Ньургуйаана Илларионова, улуус култуураҕа уонна норуот айымньытыгар салалтатын салайааччыта Иван Иванов, Саха сиригэр гражданскай сэрии историятын түмэлин исписэлииһэ Вера Шилова, А.А. Черемных аатынан оҕо искусствотын оскуолатын преподавателэ Виктория Григорьева, Ил Түмэн дьокутаата, Е. Ярославскай аатынан Дьокуускайдааҕы хотугу норуоттар историяларын уонна култуураларын судаарыстыбаннай холбоһуктаах түмэлин дириэктэрэ Николай Бугаев, СӨ уопсастыбаннай палататын чилиэннэрэ Иван Горохов, Сергей Анисимов, Сергей Расторгуев, маны сэргэ Амма улууһун уопсастыбаннай Сэбиэтин бэрэссэдээтэлэ Степан Бурнашев, Сэбиэт чилиэнэ Любовь Заварзина, өр кэмҥэ улуус дьокутааттарын Сэбиэтин бэрэссэдээтэлинэн үлэлээбит Алексей Карманов кыттыыны ыллылар уонна бэйэлэрин санааларын тириэртилэр.
“Биһиги улууспутугар өрөспүүбүлүкэ уопсастыбаннай палататын уопуттаах чилиэннэрэ кэлэн барбыттара олус суолталаах. Чахчы да 80-тан мөл. солкуобайдаах үлэ барбыт Саһыл Сыһыы комплекспыт билигин туох да хаһаайына суох курдук. Этэргэ диэри сир-халлаан икки ардыгар турар. Бу комплекс маннык Ил Дархаммыт өйөбүлүнэн тутуллан баран, салгыы үчүгэйдик хараллыахтаах, харыстаныахтаах. Ол инниттэн манна хаһаайын, анал штаттар наадалар. Ону улуус да, нэһилиэк да бэйэтин суотугар көрөр кыаҕа суох. Ол иһин биһиги уопсастыбаннай Сэбиэппит өрөспүүбүлүкэ уопсастыбаннай палататыгар сурук суруйан турар. Дьэ ол быһыытынан ону болҕомтоҕо ылан кэлэн, бэйэлэрэ көрөн-истэн, дьон санаатын билэн барбыттара олус үчүгэй, онон биһиги кинилэргэ махталбытын тириэрдэбит. Бэртээхэй кэпсэтии буолла. Манна Ил Түмэн дьокутаата, Емельян Ярославскай аатынан түмэл дириэктэрэ Николай Дмитриевич Бугаев кэлбитэ суолталаах. Инникитин Саһыл Сыһыы өрөспүүбүлүкэ суолталаах эбийиэк буоларынан, кини бу түмэлгэ филиал буолуон наада. Онон бу боппуруоска биһиги салгыы үлэлэһэбит”, — диэн улуус баһылыга Степан Кузьмин санаатын үллэһиннэ.
Мунньах түмүгэр СӨ Уопсастыбаннай палата Махтал суруктарын улуус уопсастыбаннай Сэбиэтин чилиэннэрэ Любовь Заварзина, Вероника Николаева, Виктория Владимирова, Роман Алексеев туттулар.
Салгыы кэлбит бөлөх “Доруобуйа” национальнай бырайыагынан тутуллубут Бөтүҥнээҕи врачебнай амбулаторияны көрдүлэр. Манна кинилэр үлэһиттэр туох кыһалҕалаахтарын, тутуу хаачыстыбатын туһунан ыйыталастылар. Бу кэнниттэн Абаҕаҕа тиийэн олохтоох дьаһалтаны көрүстүлэр, нэһилиэк түмэлигэр сырыттылар, Саһыл Сыһыыга тиийэн комплексы сэргии көрдүлэр.
СӨ уопсастыбаннай палататын үлэтин туһунан сиһилии хаһыакка суруйуохпут.
“Амма олоҕо” хаһыат