Абаҕа нэһилиэгин олохтоох дьаһалтата уонна олохтоох эр дьон тахсаннар Саһыл-Сыһыы мемориальнай комплексыгар субуотунньуктаатылар. Субуотунньук кэлэр сыл сааһыгар баһаартан сэрэтэр үлэни ыытыы чэрчитинэн барда.
“Күн-дьыл арыый мөлтөх буолан элбэх киһи тахсыбата эрээри былааннаммыт үлэ барыта ыытылынна. Субуотунньугу нэһилиэк баһылыга Максим Владимирович Семенов бэйэтэ иилээн-саҕалаан ыытта. Ол курдук уһаайбаларга үүнэн турар сэтиэнэх оттору барытын охсон мустубут. Бөх-сыыс да баарын барытын ыраастаатыбыт.
Онон күүстээх үлэ барда. Субуотунньукка комплекс харабыла Константин Егорович Степанов, Абаҕа нэһилиэгин бочуоттаах олохтооҕо Иван Егорович Захаров, Константин Константинович Захаров, олох -дьаһах коммунальнай хаһаайыстыбатыттан Саргылан Андреевич Колесов, спортсаала үлэһиттэрэ Тимур Гаврильевич Артемьев, Виктор Васильевич Харитонов, суоппарбыт Александр Иванович Назаров сырыттылар. Өрүһү моторканан Тимур Васильевич Карманов туоратта. Онон бу кыттыбыт дьоммутугар барыларыгар, олохтоох дьаһалта аатыттан махталбытын тириэрдэбит. Куруутун да бу курдук, бары биир санаанан салаллан, нэһилиэкпитигэр ыытыллар үлэлэргэ көхтөөхтүк кыттаргытыгар ыҥырабыт”, — диэн Абаҕа нэһилиэгин спортсаалатын салайааччыта Кирилл Павлов-Айылгын сырдатар.
“Амма олоҕо” хаһыат
