Амматааҕы киин бибилэтиэкэҕэ анал байыаннай дьайыыга хорсуннук киирсэ сылдьан сырдык тыына быстыбыт Егор Попов – Кеккан туһунан кэпсиир «Киһи кэрэмэһэ Кеккан» саҥа кинигэ күн сирин көрбүтүн бэлиэтиир, билиһиннэрэр тэрээһин ыытылынна.
Бу кинигэҕэ анал байыаннай дьайыы кыттыылааҕа, Чакыр нэһилиэгиттэн төрүттээх Егор Николаевич Попов буойун буолан, ууну-уоту быыһынан сылдьыбыт хорсун сырыыларын, бу орто дойдуга ананан кэлбит олоҕор сылгыһыт, булчут, доҕор-атас, убай — быраат, аҕа буолан олох олорон ааспытын туһунан истиҥ суруктар, ахтыылар, хаартыскалар киирдилэр. Видеолары табыгастаах гына анал «Оживи» сыһыарыынан туһаайан көрүөххэ сөп. Амма улууһугар аан бастакынан анал байыаннай дьайыы кыттыылааҕын туһунан тахсыбыт кинигэни сүрэхтээһиҥҥэ Амма улууһун баһылыгын социальнай боппуруостарга солбуйааччы Ньургуйаана Илларионова, Амма нэһилиэгин баһылыга Михаил Артемьев, Чакыр нэһилиэгин баһылыгын солбуйааччы Иннокентий Тарасов, “Амарах сүрэх” уопсастыбаннай түмсүү салайааччыта Римма Алексеева, Кеккан төрөппүт уола Мичил Попов, бииргэ төрөөбүттэрэ, аймахтара, доҕотторо кыттыыны ыллылар.
Сүрэхтэнии Егор Попов-Кеккан төрөөбүтэ 50 сылын туолар күнүгэр ыытыллыбыта ураты буолла. Кинигэни Кеккан бииргэ төрөөбүт балтылара Саргылана Шестакова уонна Елена Фомина хомуйан оҥордулар. Уопсайа 50 тираһынан “Алта” кинигэ кыһатыгар таҥыллан, “ДаниАлмас” типографияҕа бэчээттэнэнэн таҕыста. Уопсайа тоҕус түһүмэхтэн туран, Егор Николаевич оскуола сааһыттан саҕалаан кини үлэһит, буойун буолбут суолларын кини чугас дьоно, доҕотторо кэпсээбиттэр.
Вероника СТРУЧКОВА, кииннэммит бибилэтиэкэ кыраайы үөрэтэр салаатын сүрүн бибилэтиэкэрэ