2026 сыл Амма улууһугар Тыа хаһаайыстыбатын сыла. Бу бэлиэ сыл биллэн турар нэһилиэги сайыннарыыга туһуланар. Сатаҕай нэһилиэгэр эмиэ быйылгы сыл Тыа хаһаайыстыбатын сылынан биллэриллэн үөрүүлээхтик арылынна.
Бүгүҥҥү күнүнэн Сатаҕай нэһилиэгин кэтэх хаһаайыстыбаларыгар 328 ынах сүөһү баар. Үлэ Геройа Т.С. Лукин аатынан тыа хаһаайыстыбатын производственнай кэпэрэтиибин эдэр, эрчимнээх Василий Артемьев салайар. Хаһаайыстыба 280 ынах сүөһүлээх. Бааһынай хаһаайыстыбаларга уопсайа 420 төбө иитиллэр. Сылгы ахсаана кэтэх хаһаайыстыбаларга — 287 төбө, ТХПК- 507, бааһынай хаһаайыстыбаларга – 331 төбө баар. Нэһилиэккэ уопсайа 1125 сыспай сиэллээх хаһыыга сылдьар. Үөрүүлээх тэрээһини «Айыллык” култуура киинин исписэлииһэ Даниил Атласов иилээн-саҕалаан ыытта. Дойдубутугар Норуоттар сомоҕолоһууларын, өрөспүүбүлүкэбит үрдүнэн биллэриллибит Култуура сылын уонна Аммабыт улууһугар уонна нэһилиэкпитигэр Тыа хаһаайыстыбатын сылын үөрүүлээх аһыллыытыгар эҕэрдэ тылы баһылык Алексей Шишигин, “Айыллык” норуот айымньытын дьиэтин дириэктэрэ Екатерина Аммосова, олохтоох бибилэтиэкэ үлэһитэ Анна Андреева тириэртилэр.
Сатаҕай нэһилиэгэр урукку сылларга колхоз, совхоз саҕаттан тыа хаһаайыстыбата сайдарыгар илиилэрин араарбакка, араас үлэҕэ үлэлээн ааспыт туруу үлэһит дьоммутун, билиҥҥи кэм бастыҥ үлэһит дьонун хаартысканан сырдатан көрдөрдүлэр. Төрөөбүт дойдуларын сайдыытыгар киллэрбит сүҥкэн кылааттара сурукка тиһиллэн кэпсэниэ уонна ахтыллыа турдаҕа. Билигин саҥа үйэ сайдыытын хаамыытынан, өрөспүүбүлүкэ тыа хаһаайыстыбатын өйүүр бырагыраамалара олоххо киирэннэр тыа сирэ иккис тыыны ылар. Быйыл нэһилиэкпитигэр саҥа үүт тутар сыах арыллан үлэтэ-хамнаһа сотору кэминэн саҕаланыа. Онон үрүҥ илгэни үрүлүтээччилэргэ, эмис эти дэлэтээччилэргэ улахан болҕомто ууруллара саарбаҕа суох. Нэһилиэккэ аҕам саастаах дьон кэтэх хаһаайыстыбаларын эспэккэ тутан олороллоро үтүө дьыала. Кинилэр үлэҕэ баҕалаах, үлэттэн чаҕыйбат буоланнар, пенсияҕа да тахсан баран, дьарык оҥостон үлэлии сылдьаллара хайҕабыллаах. Сыспай сиэллээх сылгыны, хороҕор муостаах сүөһүнү көрөр кэтэх хаһаайыстыбалар иннилэригэр үгүс соруктар, былааннар туолалларын туһугар анаммыт туһааннаах сылга үүттэн уонна эттэн оҥоһуллан тахсар ас-үөл эгэлгэтэ дэлэйэригэр, дьиэ кыыла, араас көтөрдөр элбииллэригэр, оҕуруот аһын эгэлгэтин үүннэрэн байылыат, эйэлээх олох туругурарын баҕарабыт.Үөрүүлээх тэрээһини “Оһуор” үҥкүү бөлөҕө, сцена бэтэрээнэ Гаврил Орлов, “Төннүгэс андылар” эр дьон, “Дьүрүһүй” дьахталлар ансаамбыллара кэрэ ис хоһоонноох ырыаларынан, үҥкүүнэн тыа сирин туруу үлэһит дьонун эҕэрдэлээтилэр. Нэһилиэкпит түөлбэлэрин күүһүнэн бэйэ оҥоһук, ас-үөл дьаарбаҥката тардыллынна, добун оһуохай дьиэрэйдэ.
Христина СКРЯБИНА
Раиса Апросимова хаартыскаҕа түһэриитэ.