И.И. Константинов — Дэлэгээт Уйбаан аатынан орто оскуола выпускниктара, Сулҕаччы нэһилиэгин ыччаттара дойдуларын көмүскэлигэр анал байыаннай дьайыыга ытык иэстэрин хорсуннук толоро сылдьаллар. Кинилэр хорсун сырыылара кэлэр кэнчээри ыччакка кэпсээн, үтүө холобур буоллун диэн Бүтүн Россия үрдүнэн ыытыллар, көлүөнэни ситимниир соруктаах-сыаллаах “Герой паартата” бырайыакка кыттан, Сулҕаччы оскуолатын бүтэрбит үөрэнээччилэргэ анаан оҥоһуллубут “Герой паартатын” арыллыыта буолан ааста.
“Герой паартата” оскуолаҕа анал байыаннай дьайыыга кытта сылдьар Сулҕаччы нэһилиэгин ыччаттарыгар уонна Саха сириттэн Арассыыйа Геройдара аатын ылбыт хорсун буойуттарга анаан турбут стендэлэр муннуктарыгар турда. Тэрээһин үөрүүлээх чааһын “Харачаас” байыаннай-патриотическай кулууп уолаттара, оскуола IX-XI кылааһын үөрэнээччилэрэ астылар. Кинилэр оскуоланы араас сылга бүтэрбит хорсун саллаат выпускниктарбыт тустарынан кылгастык билиһиннэрдилэр. Өрөгөйдөөх чааска Сулҕаччы нэһилиэгин баһылыгын солбуйааччы Василий Неустроев, оскуола дириэктэрэ Иван Окороков кыттыыны ыллылар, санааларын тириэртилэр. Бу тэрээһиҥҥэ ыытыллыбыт үлэни, ол курдук матырыйааллары, хаартыскалары хомуйуу, түмүү туһунан оскуола түмэлин салайааччыта Екатерина Михайлова сырдатта, нэһилиэк аҕам саастаахтарын уонна бэтэрээннэрин сэбиэтин бэрэссэдээтэлэ, бибилэтиэкэр Елена Попова саҥа тахсыбыт анал байыаннай дьайыы кыттыылаахтарын туһунан кинигэлэри билиһиннэрдэ.
Герой паартатын арыйар чиэс өрөспүүбүлүкэтээҕи ”Эдэр Карбышевтар” оҕо уопсастыбаннай хамсааһынын чилиэнэ, IX кылаас үөрэнээччитэ Тимур Бурцевка уонна оскуола бэрэсидьиэнэ X кылаас туйгун үөрэнээччитэ Даяна Максимоваҕа тигистэ. Онтон “Герой партатыгар” маҥнайгынан XI кылаас бастыҥ үөрэнээччилэрэ Максим Максимов уонна Айаал Слепцов олорор үрдүк эппиэтинэһи сүктүлэр.
Тэрээһин түмүгэр V кылаас үөрэнээччилэрэ, Арассыыйа байыаннай-патриотическай “Юнармия” түмсүү кыттыылаахтара Женя Суҥхалырова, Нелли Степанова Арассыыйа геройдарын туһунан хоһоону доргуччу аахтылар уонна уопсай хаартыскаҕа түһүү буолла. Тэрээһини оскуола дириэктэрин иитэр үлэҕэ солбуйааччы Аграфена Данилова иилээн-саҕалаан ыытта.
Елена ПОПОВА