Аны аҕыйах хонугунан, кулун тутар 19 күнүгэр, өрөспүүбүлүкэбит киинэтин тыйаатырдарыгар айылҕалыын, кыыллары кытта алтыһыыны көрдөрөр “Мэхээлэчээн булчут” уус уран киинэ тахсаары турар. Киинэни дьон-сэргэ билигин көстө турар угуйуктары көрөн, көрө охсуон баҕата улахан.
“Биһиги бары сөбүлүүр, урут уруккуттан сөбүлээн ааҕар “Мэхээлэчээн булчут” диэн Тимофей Сметанин уонна Яков Стручков суруйбут кэпсээннэринэн киинэ тахсыбытын истэн бэркэ сэҥээрэн, күүтэ сылдьабыт. Өссө киинэ бэйэбит улууспутугар, Мээндиги нэһилиэгэр эмиэ уһуллубут эбит. Онон интэриэс өссө улахан. Билигин социальнай ситимнэринэн, “Саха” тэлэбиидэнньэтигэр да тахса турар киинэ туһунан кылгас угуйуктары көрөн интэриэспит өссө улаатта. Мэхээлэчээн булчут мүччүргэннээх сырыылара омуннаах да соҕус буолаллар, бу киһи айылҕаны, кыылы-сүөлү кытта ыкса алтыһыытын, үтүө сыһыанын көрдөрөр, элбэххэ үөрэтэр. Онон бу билиҥҥи кэмҥэ кэлэр кэнчээри ыччаттарбытыгар олус наадалаах дии санаатым. Ордук уол оҕону иитиигэ туһалаах буолуо диэн эрэнэбит. Дьиҥ эһэни миинии өссө ханнык да саха киинэтигэр көстө илик этэ. Аны кыыллар саҥараллара, киһилии кэпсэтэллэрэ бэйэтэ ураты эбит. Быйыл биһиги кытыы сытар нэһилиэкпитигэр Сулҕаччыга киинэ көстөр буолбута олус үчүгэй. Онон дьэ бу саҥа киинэни бары өрөспүүбүлүкэ олохтоохторун кытта тэҥҥэ көрүөхпүт диэн үөрэн, долгуйан, кэтэһэ сылдьабыт”, — диэн Сулҕаччы нэһилиэгин бочуоттаах олохтооҕо, Арассыыйа уопсай үөрэхтээһинин бочуоттаах үлэһитэ Екатерина Рязанская санаатын үллэстэр.
“Амма олоҕо” хаһыат