Ньукуола күнүгэр Сулҕаччы олохтоохторо уонна аҕам саастаахтара Киристэпиэл Махсыымап уһаайбатыгар түмсэн, саха дьонун сиэринэн минньигэс кус миинэ, итии үүттээх чэй, сылаас алаадьы, саламаат сиэтибит. Бэртээхэй тэрээһиҥҥэ оҕолуун-кырдьаҕастыын 70-тан тахса киһи муһунна.
Сыл аайы кэһиллибэт үтүө үгэс быһыытынан быйыл Ньукуолаҕа Сулҕаччы нэһилигин эр дьонун түмсүүтэ (салайааччы Георгий Степанов, солбуйааччы Алексей Никифоров) барыта холбоон 91 куһу дьаһалтаҕа туттарбыта. Ону тыыл бэтэрээннэригэр, сэрии тулаайахтарыгар дьиэнэн сылдьан түҥэттилэр.
Самаан сайын саҕаланар, саха дьонугар саамай күүтүүлээх Ньукуола күнүн сиэрин-туомун, алгыһын СӨ үөрэҕириитин үтүөлээх үлэһитэ, Амма улууһун бочуоттаах олохтооҕо, педагогическай үлэ бэтэрээнэ Алексей Ильич Никифоров ыытта.
Нэһилиэк аҕа баһылыга Артем Германович Степанов, биэнсийэлээхтэр уонна бэтэрээннэр түмсүүлэрин бэрэссэдээтэлэ Елена Васильевна Попова эҕэрдэлэрин тиэртилэр. Артем Германович сэрии тулаайаҕа, үлэ ветерана, ССРС кинематографиятын туйгуна Константин Афанасьевич Рязанскайга СӨ Бырабыыталыстыбатын эҕэрдэ суругун уонна сыаналаах бэлэҕин, өр сыл уот ситимэр үлэлээбит Николай Платонович Пудовка Амма улууһун баһылыга Степан Николаевич Кузьмин “Эҕэрдэ суругун” уонна сыаналаах бэлэҕин туттартаата.
Өлгөм астаах остуол тула аргыый наллаан кэпсэтии, санаа атастаһыыта буолла. Мустубут дьону түөлбэбит ытык-мааны олохтоохторо — өр сыл Сулҕаччы орто оскуолатын директорынан үлэлээбит, педагогическай үлэ бэтэрээнэ Алексей Ильич Никифоров быйыл саҥа таһаартарбыт, улуус спордугар анаммыт кинигэтин дьоҥҥо билиһиннэрдэ уонна бэлэх уунна, нэһилиэкпитигэр тыа хаһаайыстыбата сайдыытыгар үйэлэрин тухары үлэлээбит Дария Константиновна Чудинова, Мирон Никитич Неустроев, Семен Никитич уонна Любовь Дмитриевна Еримеевтэр, нэһилиэк социальнай-культурнай олоҕор мэлдьи актыыбынай кыттыыны ылар Екатерина Петровна уонна Данил Петрович Михайловтар дьиэ кэргэн, үлэ бэтэрээннэрэ Ярослав Алексеевич Никитин, Анастасия Николаевна Неустроева, өр сыл пенсионердар уонна ветераннар түмсүүлэрин салайан үлэлэппит СӨ үөрэҕириитин туйгуна Зоя Петровна Рязанская, СӨ үтүөлээх фермерэ Дария Стиновна Капитонова, уонна да атыттар тыл этэн эҕэрдэлээтилэр, санааларын эттилэр.
Ырыа-тойук да баар буолла. Культура киинин үлэһиттэрэ түөлбэлэринэн, Саха сирин үрдүнэн ыытыллар Сайылык күнүгэр сыһыаннаах көрдөөх эстафеталарыгар уонна викторинаҕа түөлбэнэн күрэх буолла. Боппуруостарга эппиэттээн, кыах төһө тиийэринэн сүүрэн-көтөн, ох саанан да ытан, быһата сонун күрэххэ дьон көхтөөхтүк кытынна, ыалдьааччылар, көрөөччүлэр аһара астыннылар. Уопсай түмүккэ “Хомус” түөлбэ бастакы. “Аргыс” түөлбэ иккис уонна “Хомуур” хобоһуктаах хамаанда үһүс миэстэ буоллулар. Маннык тэрээһин быйыл саҥа тэрилиннэ.
Дьон астынан, үөрэн-көтөн тарҕаста. Бэйэтэ ыһыах курдук буолла дэстилэр. Сонун тэрээһиҥҥэ сүүрбүт-көппүт, кустары үргээн мип-минньигэс миин буһарбыт, алгыстаах алаадьынан, сахалыы саламаатынан айах туппут, итии үүттээх чэйинэн күндүлээбит, оонньуутун-көрүн, күрэҕин тэрийбит Сулҕаччы нэһилиэгин дьаһалтатын, Х.Максимов аатынан культура уонна сынньалаҥ киинин үлэһиттэригэр, байанай бэлэҕинэн күндүлээбит эр дьон түмсүүтүгэр истиҥ махтал тылларын элбэх киһи эттэ, социальнай ситимнэринэн да суруйан ыыттылар, “Кыайыы да күнэ, Ньукуолуну да көрсүү тэрээһиннэрэ олус үчүгэйдик ыытылыннылар, түмсүүлээхтик. Тэрийээччи, сүүрээччи-көтөөччү дьоммутугар барҕа махтал, куруук түмсүүлээх буолуоҕуҥ”. Уонна эһиил эмиэ буолара буоллар диэн баҕа санааларын да эттилэр.
Елена Попова.