Амма Наахара нэһилиэгэр сүөһү иитэн олорор кэтэх хаһаайыстыбалаах ыалларга кыстыкка бэлэмнэнии туһунан мунньах тэрилиннэ. От, ходуһа туһунан кэпсэтиигэ элбэх киһи санааларын эттилэр, тыа хаһаайыстыбатыгар баар ирдэбиллэр, көмөлөр тустарынан үгүһү биллилэр.
Мунньаҕы нэһилиэк баһылыга Захар Семенович Александров иилээн-салайан ыытта. Быйыл кураан сайын туран оппут үүнүүтэ мөлтөх. Бу билиҥҥи туругунан ынах-сүөһү иитэр ыалларга саамай долгутар тыын боппуруос буолар. Онон мунньахха от, ходуһа туһунан кэпсэтиигэ элбэх кыттан санааларын эттилэр.
Нэһилиэк баһылыгын солбуйааччы Сахаяна Иннокентьевна Михайлова тыа хаһаайыстыбатын хайысхатынан социальнай контракт туһунан иһитиннэрдэ, кэккэ сүбэлэри биэрдэ.
Нэһилиэк бэтэрэнээр бырааһа Альбина Михайловна Устинова сүөһү иитиитин, ыты көрүү-харайыы уопсай быраабылатын билиһиннэрдэ, Меркурий үлэлиир хайысхатын, чипирование туһунан кэпсээтэ. Тыа хаһаайыстыбатын исписэлииһэ Елена Николаевна Егорова ынахха ааҕыллар субсидияны сиһилии билиһиннэрдэ, маны таһынан тыа хаһаайыстыбатын салаатынан боппуруостарга эппиэттээтэ. Сир боппуруоһугар КУМИ исписэлииһэ Виктор Валерьевич Гаврильев ыйытыктарга хоруйдаата. Мунньах олус сэргэхтик ааста. Кыһынын ойбон алларыы, ыты иитиигэ, көрүүгэ-харайыыга сэрэтии үлэлэр ыытылыннылар. Мунньах барыта боротокуолланна. Түмсүбүт дьон элбэҕи истэн-билэн тарҕастылар.
Ирина Корякина – Олесова.