Амма нэһилиэгин “Хатыҥчаана” уһуйаанын иитиллээччилэрэ Санкт Петербург куоракка ыытыллыбыт аан дойду таһымнаах «ДЕТалька-2024» диэн робототехника уонна цифровой технологиялар күрэхтэригэр кыайыылаах таҕыстылар.
Бу күрэххэ Арассыыйа 25 регионнарыттан, ону тэӊэ Казахстан уонна Узбекистан ѳрѳспүүбүлүкэлэриттэн 350 оҕо кыттыыны ылла. Күрэх сүрүн сыалынан оҕолор инженернэй уонна научно – техническэй толкуйдарын сайыннарыы, инникитин IT техническэй хайысхалаах идэни талалларын кѳҕүлээһин буолар. Күрэх тэрийээччилэринэн робототехникаҕа уонна нейротехнологияҕа үѳрэтэр комплекстары оӊорон таһаарар «Бренд Девелопмент» уонна «РОБОТРЕК» хампаанньалар, МГПУ, Аан дойдутааҕы IYRA Азия дойдуларын ассоциацията, «Нейрообразование» ассоциация, эбии үѳрэхтээһин Федеральнай киинэ уо.д.а. буолаллар. Саха өрөспүүбүлүкэтин хамаандатын Региональнай ресурснай киин — АНО «Детский центр робототехники» салайааччыта, СӨ үѳрэҕириитин туйгуна Октябрина Семеновна Петрова салайан илдьэ сырытта. Бу киин өрөспүүбүлүкэ таһымыгар робототехника күрэхтэрин ситиһиилээхтик тэрийэн ыытар, оҕолор Арассыыйа, Аан дойду таһымыгар ыытыллар чемпионаттарга кытталларыгар кыах биэрэр. Күрэххэ Саха сирин араас улуустарыттан, ол эбэтэр Амма, Сунтаар, Горнай, Бүлүү, Нам, Ньурба уонна Дьокуускай куорат, 12 уһуйааннарын хамаандалара (32 оҕо) кыттыыны ыллылар.
Саха сирин оҕолорун хамаандалара 5-7 саастаах оҕолор икки ардыларыгар ыытыллар «Нейролабринт», «Юный пифагор», «Занимательная математика» категорияларга тэӊнээхтэрин булбатылар. 4-5 саастаах оҕолор икки ардыларыгар ыытыллыбыт күрэххэ Саха сириттэн барыта 3 хамаанда бастыӊнар кэккэлэригэр киирдилэр. Олор истэригэр биһиги оҕолорбут Амматааҕы «Хатыӊчаана» уһуйаан иитиллээччилэрин «Драйв» хамаанда кыайыылаах аатын сүктүлэр. Хамаанда састааба Терентьева Сандаара уонна Петров Максим, салайааччылара Игнатьева Айталина Николаевна, Толстоухова Алена Егоровна.
Оҕолорбут сыл устата дьаныардаах дьарыктара үтүѳ түмүктээх буолбутунан киэн туттабыт, уһуйааннарын, улуустарын, өрөспүүбүлүкэлэрин аан дойду таһымнаах күрэххэ ааттаппыттарынан астынабыт. Инникитин даҕаны салайааччыларын Айталина Николаевна, Алена Егоровна үѳрэтиилэринэн элбэх кыайыыны аҕалыахтара диэн эрэнэбит.
Мария НЕУСТРОЕВА, Амматааҕы «Хатыӊчаана» уһуйаан сэбиэдиссэйи иитэр – үѳрэтэр үлэҕэ солбуйааччы