Улуу Кыайыы күнэ чугаһаатар чугаһыыр. Бу ытык бырааһынньыгы хас биирдии тэрилтэ тэрээһиннээхтик көрсөргө бэлэмнэнэр. Бөтүҥнээҕи “Мичээр” уһуйаан иитиллээччилэрэ агитбиригээдэнэн нэһилиэктэрин ытык бэтэрээннэригэр «Ким да умнуллубат, туох да умнуллубат»-диэн девизтээх ыалдьыттаатылар, бэркэ сэргэхситтилэр.
“Уһуйааммыт бэлэмнэнии бөлөҕүн оҕолоро Улуу кыайыы 80 сылын көрсө икки гына арахсан тыыл бэтэрээннэригэр, сэрии сылын оҕолоругар бэйэлэрин эҕэрдэ кэнсиэртэрин көрдөрдүлэр, өйдөбүнньүк открыткаларын бэлэхтээтилэр, уһуйаан үлэһиттэрэ оҥорбут георгиевскай лиэнтэлэрин түөстэригэр ииллилэр. Уопсайа 10 ыалга сырыттыбыт. Бу айаммытыгар Бөтүҥ нэһилиэгин бэтэрээннэрин сэбиэтин бэрэсэдээтэлэ Давыдова Тамара Прокопьевна күүс-көмө буолла.
Суоппардарбыт олохтоох ОДьКХ начальнига Филатов Александр Васильевич, төрөппүт Гурьев Иван Анатольевич оҕолору тиийиэхтээх сирбитигэр чопчу ыйыллыбыт маршрутунан сырытыннардылар, күүс көмө буоллулар. Бу Улуу Кыайыыга анаммыт былааннаах үлэбит биир сыалын ситиһэрбитигэр тэҥҥэ үлэлэспит дьоммутугар иитээччилэр, оҕолор, төрөппүттэр ааттарыттан махтанабыт. Ытык бэтэрээннэрбит уһуйаан бары үлэһиттэригэр махтал тылларын тириэрдэн, кырачаан ыалдьыттарыгар кэһиилэрин утары ууннулар. Бу тэрээһинтэн бары да астынныбыт, дуоһуйдубут”, — диэн уһуйаан бэлэмнэнии бөлөҕүн иитээччитэ Мария Иванова сонунун үллэһиннэ.
“Амма олоҕо” хаһыат