Сылын аайы ох курдук оҥостон, үҥкүү – битии аргыстаах, бэйэлэрин кэмнэригэр үлэлээн – хамнаан, улуус, өрөспүүбүлүкэ сайдарын туһугар бэйэлэрин кылааттарын киллэрсибит күндү дьоммут анал күннэрэ, дэкээдэлэрэ олус интэриэһинэйдик, көхтөөхтүк ааһар. Быйыл эмиэ Амматааҕы Ф. Потапов аатынан норуот айымньытын дьиэтигэр, Амма улууһуттан 13 нэһилиэк кыттыылаах, Аҕам саастаахтар декадаларын түмүктүүр дьоро күнэ үрдүк таһымҥа буолан ааста.
Тэрээһин уруһуй уонна хаартыска выставка күрэҕинэн аһылынна, хас биирдии нэһилиэктэн олус үчүгэй уруһуйдар, сэдэх хаартыскалар турдулар. Кыттааччылар айымньылаах үлэлэрэ сыаналанна, көрөөччү сэргээтэ.
Дьоро күн үөрүүлээх чааһыгар, улуус баһылыга Степан Кузьмин, баһылыгы социальнай боппуруоска солбуйааччы Николай Ларионов, Амма улууһун култуураҕа уонна норуот айымньыгар салалтатын салайааччыта Иван Иванов, улуустааҕы бэтэрээннэрин сэбиэтин бэрэссэдээтэлэ Мария Захарова, улуустааҕы үөрэх управлениетын салайааччытын иитэр үлэҕэ уонна эбии үөрэхтээһиҥҥэ солбуйааччыта Акулина Иванова эҕэрдэ тылларын тириэртилэр. Бу күн Болугур нэһилиэгиттэн 20-тэн тахса аҕам саастаах дьоммут киирэн кыттыыны ыллылар. Манна үөрүүлээх чааска Галина Алексеевна Неустроеваҕа уонна Елена Николаевна Ефремоваҕа Амма улууһун үөрэҕириитин салалтатыттан Махтал сурук туттарыллынна.
Үөрүүлээх чиэстээһин кэннэ бырааһынньыктааҕы эҕэрдэ кэнсиэр буолла. Болугур нэһилиэгиттэн «Чөмчүүк» уонна «Арчылаана» үҥкүү бөлөхтөрө эҕэрдэ нүөмэрдэрин бэлэхтээтилэр. Улуустааҕы тэрээһиҥҥэ бэлэмнээн киллэрбит дьоммутугар Болугур нэһилиэгин кырдьаҕастарын сэбиэтин бэрэссэдээтэлигэр Кондакова Надежда Иннокентьевнаҕа уонна солбуйааччытыгар Никифорова Анастасия Николаевнаҕа, «Арчылаана» эбэлэр түмсүүлэрин салайааччыта Иванова Ульяна Ивановнаҕа, «Чөмчүүк» түмсүүгэ салайааччы Ефремова Оксана Константиновнаҕа уонна уруһуй күрэҕэр Ефремова Елена Николаевнаҕа, Петрова Мария Васильевнаҕа, Павлова Елизавета Михайловнаҕа, Пахомова Надежда Валерьевнаҕа, хаартыска күрэҕэр Кузьмина Ульяна Юдовнаҕа, Михайлова Ульяна Майродовнаҕа, Аммосова Марфа Ивановнаҕа барҕа махталбытын тиэрдэбит. Күндү дьоммут чэгиэн туруктаах, ырыа – үҥкүү аргыстаах, үөрүү, кыайыы көтөллөөх сылдьыҥ.
Евдокия ПЛАТОНОВА