Н.Е. Иванов аатынан Бөтүҥ орто оскуолатыгар сылын ахсын буоларын курдук Ороһооспону көрсө 8 — 11 кылаас үөрэнээччилэрэ уонна орто уонна үрдүк үөрэх кыһаларыгар үөрэнэ сылдьар устудьуон оҕолор кыттыылаах идэҕэ туһаайар сыаллаах истиҥ көрсүһүү буолан ааста.
Үөрэнээччилэр ханнык идэни талыахтарын уонна онно ханнык предметтэри туттарыахтаахтарын сиһилии билистилэр. Кинилэр баҕарар идэлэрэ ханнык үөрэх кыһатыгар баарын ырытан көрдүлэр.
Ыытааччы биэрбит араас ситуациялартан хайдах быһаарыныы ылынары тобуллулар.
Мединститут стоматология салаатын 2 кууруһун устудьуона Саша Семенова:
-Мин үөрэҕим олус ыарахан, эппиэтинэстээх. Курспутугар 50-мут Элбэх преподаватель ирдэбиллэрэ атын-атын, араас майгылаах буолаллар. Мин эһиэхэ сүбэ курдук этиэм этэ: оҕолор, эһиги барыга-бары көхтөөх уонна бириэмэни сатаан аттарынар буоллаххытына, кэмигэр СРС-тары туттаран истэххитинэ, барыта табыллыа. Ол аата толоругас, истигэн, дьону кытта уопсай тылы сатаан булар буоллахха наада.
Дьокуускайдааҕы тыа хаһаайыстыбатын техникумун 1 кууруһун устудьуона Сахаян Конников:
-Мин10-с кылаас кэнниттэн 9-ска ылбыт ситии-хотуу аттестатынан үөрэххэ киирбитим. Дисциплина диибин. Хойутаатыҥ, биричиинэтэ суох көтүттүҥ да үүрүллүөххүн сөп.
Хаандыгатааҕы горногеологическай техникум «Обогатитель полезных ископаемых» факультет 1 кууруһун устудьуона Нюргустана Никулина:
-Мин 9-с кылаас кэнниттэн хас да үөрэх кыһатыгар докумуоммун туттаран баран, Хаандыганы талбытым. Билигин оскуола программатынан үөрэнэ сылдьар буолан, үгүс ыарахттары көрсө иликпит. Көхтөөхтүк бары тэрээһиннэргэ кыттан иһиэххэ наада.
Ити курдук устудьуон үрдүк аатын сүкпүт оҕолор үөрэнээччилэргэ сүбэ-ама эттилэр, баҕа санааларын тиэртилэр. Ол курдук, хас биирдиигит оскуола саҕаттан дисциплинаны, режими тутуһа, үөрэххэ эппиэтинэстээхтик сыһыаннаһа уонна бэйэни сатаан көрүнэ үөрэнэллэригэр баҕардылар. Киэҥ сиргэ киһи ымсыырара элбэх, онно мээнэ харчыны бараабакка сатаан тутта үөрэниэххэ наадатын бэлиэтээтилэр.
Онтон биһиги көччөх гына көтүтэн ыыппыт выпускниктарбытыгар ыарахантан чаҕыйбакка инники сыалларын толору ситиһэн, талан ылбыт идэлэригэр бэриниилээх, үтүө үлэһит дьон буола улааталларыгар баҕара хааллыбыт. Устудьуоннарбыт куруутун оскуолаларын ахтан кэлэн ыалдьыттаан, ирэ-хоро кэпсэтэн, сүбэ-ама биэрэн баралларыттан олус астынабыт, үөрэбит.
Мария Иванова.