Бөтүҥнээҕи “Мичээр” оҕо сайдар киинигэр үһүс сылын “Магия танца” диэн үҥкүү күрэҕэ үгүс оҕону уонна төрөппүтү тардан ыытыллар. Күрэҕи уһуйаан муусукаҕа салайааччыта Елена Никитина көҕүлээн ыытар. Быйылгы күрэх эмиэ олус интэриэһинэйдик тэриллэн, кыттааччылар бука бары бэлэмнэнэн араас үҥкүүлэри көрдөрүлэр.
«Муус устар 29 күнэ Аан дойдуга үҥкүү күнэ. Бу күн чэрчитинэн уһуйааммытыгар үһүс сылын «Магия танца» үҥкүү күрэҕин тэрийэн ыытабыт. Быйылгы күрэхпитигэр бөлөх аайыттан төрөппүт оҕотунаан кыттан аҕыс хамаанда киирдэ. Бары олус үчүгэйдик оҥостон, бэлэмнэнэн кэлбиттэр. Күрэхпит дьүүллүүр сүбэтигэр олохтоох култуура киинин “Махтал” үҥкүү народнай ансамбыл салайааччыта Константин Попов, хореограф идэлээх Күннэй Нестерева, талааннаах иистэнньэҥ, «Талбаана» бөлөх үҥкүүһүтэ Фекла Неустроева үлэлээн үҥкүүһүттэри сыаналаатылар. Күрэхпит түмүгүнэн 1-кы степеннээх лауреаттарынан Долгуна Степановна Ларионова кыыһынаан Кэрэчээнэлиин, 2-с степеннээх лауреаттарынан Анжелла Юрьевна Попова кыыһынан Нарыйааналыын, 3-с степеннээх лауреаттарынан Эрсан Андреев эдьиийинээн Дарияналыын, 1-кы степеннээх дипломаннарынан Майя Майевна, Георгий Афанасьевич Олесовтар кыыстара Илоналыын, 2-с степеннээх дипломаннарынан Арчын Обутов эбэтинээн Елена Николаевна Поповалыын, 3-с степеннээх дипломаннарынан Евдокия Степановна Скрябина кыыһынаан Сайнааралыын буоллулар. Маны сэргэ «Инникигэ эрэллээх» номинация хаһаайыннарынан Обутова Дайаана эдьиийэ Сайнааралыын ааттаннылар. Күрэхпит түмүгүнэн бэлэмнэнии бөлөхтөн Андрей Матвеев ийэтинээн Марина Семеновна Афанасьевалыын финскай полька үҥкүүнэн күрэх Гран при бирииһин ылан муҥутуур кыайыылаах буоллулар. Кытааччыларбыт бары бэртээхэй үҥкүүлэри бэлэмнээн туруорбуттар. Ити курдук үҥкүү күнүгэр аналлаах тэрээһиммит үрдүк таһымнаахтык буолан ааспытыттан бары тэрийээччилэр үөрдүбүт.
Күрэх тэрийэрбэр күүс-көмө буолбут дьоммор, Светлана Афанасьевна Никитина салайааччылаах «Талаана» үһүс көлүөнэ түмсүүтүгэр, нэһилиэкпит депутаттарыгар, олохтоох “Центр” маҕаһыын хаһаайкатыгар Дария Николаевна Яковлеваҕа, кыттааччылары сыаналаабыт дьүүллүүр сүбэҕэ, бары кыттыбыт дьиэ кэргэттэргэ тус бэйэм ааппыттан истиҥ махталбын тиэрдэбин. Үҥкүү кэрэ эйгэтигэр оҕо холкутук, сэргэхтик тутта-хапта үөрэнэр. Кэрэни кэрэхсии, сырдыкка тардыһа дьулуһар. Элбэх күрэхтэргэ кыттан дьонун кытта алтыһа, кэпсэтэ үөрэнэр. Ол иһин маннык күрэх олус суолталаах уонна наадалаах дии саныыбын”, — диэн күрэх тэрийээччитэ Елена Спиридоновна санаатын үллэһиннэ, күрэҕи сырдатта.
“Амма олоҕо” хаһыат