Амматааҕы Ф. Потапов аатынан норуот айымньытын дьиэтэ 49-с култуурунай сезонун түмүктүүр киэһэтин ыытта. Бу күн Амма нэһилиэгин айар талааннаахтара, айар куттаахтара мустаннар, бэртээхэй кэнсиэри көрдөрдүлэр.
СӨ култууратын туйгуна Петр Кулаковскай дириэктэрдээх норуот айымньытын дьиэтигэр күн бүгүн 30 үлэһит түбүгүрэр. Кинилэртэн биир СӨ култууратын үтүөлээх үлэһитэ, биир СӨ үтүөлээх артыыһа, биир СӨ ыччакка бэлиитикэтин туйгуна, сэттэ СӨ култууратын туйгуна, икки СӨ үтүөлээх оһуохай таһаарааччылара буолаллар. Маннык күүстээх кэлэктиип алтынньы ыйга сезоннарын аһыахтарыттан араас таһымнаах тэрээһиннэри ыытан, нэһилиэнньэни аралдьытан кэллилэр. Ону сэргэ өрөспүүбүлүкэ да, улуус да, бэл Арассыыйа да таһымнаах күрэхтэргэ кыттан ситиһии, кыайыы көтөллөөх кэлбиттэрэ. Кэлэктиип өссө биир улахан үлэтинэн, дьон-сэргэ сылдьарыгар табыгастаах гына чэпчэтинэр хос хапытаалынай өрөмүөнүн ыытта.
“Сезон устата уопсайа 135 тэрээһини ыытаммыт 41015, онтон 28 төлөбүрдээх тэрээһиннэргэ 8673 киһи сырытта. Оҕолорго уонна ыччаттарга анаммыт 12 тэрээһиҥҥэ 4211 ыччат уонна оҕо кэлэн барда. Маны таһынан “Култуура” национальнай бырайыагынан кэлбит автокулууппутунан 14 тэрээһини ыытаммыт 1245 киһини хаптыбыт. Онно холобур сайын тыа хаһаайыстыбаларын кытта сайылыктарга тиийэ сылдьыбыппыт”, — диэн норуот айымньытын дьиэтин методическай салаатын салайааччыта Гаянэ Петрова сырдатар.
Норуот айымньытын дьиэтин иһинэн 41 кулууп формированиелара үлэлииллэр. Ол курдук холобура ырыаҕа, үҥкүүгэ, театральнай, инструментальнай уонна да атыттар. Бу формированиеларга сылдьар дьон сезон сабыллыытын дьоро киэһэтигэр бэйэлэрин талааннарын көрөөччүлэргэ бэлэхтээтилэр.
Ырыа, дьоро киэһэтигэр бастыҥ үлэлээхтэр бэлиэтэннилэр. Ол курдук Амма улууһун култуураҕа уонна норуот айымньытыгар управлениетын салайааччыта Иван Иванов эҕэрдэ тылын тириэрдэ туран “Кэхтибэт кэрэ куоластар” ансаамбыл салайааччытыгар, суена бэтэрээнигэр Светлана Алексееваҕа СӨ бэтэрээннэрин бочуоттаах бэлиэтин туттарда. Итини сэргэ СӨ Ил Дарханын иһинэн “Олоҥхо” тэрийэр национальнай кэмитиэтин бэрэссэдээтэлин Махталынан фольклор исписэлииһэ Василий Кочаткин, култуура уонна норуот айымньытын управлениетын Махтал суругунан “Күндүл” үҥкүү ансаамбылын салайааччыта Лидия Шакарова бэлиэтэннилэр.
“Амма олоҕо” хаһыат