Бөтүҥ орто оскуолатыгар 11 кылааһы бүтэрэр үөрэнээччилэргэ ситии-хотуу аттестатын үөрүүлээх быһыыга туттарар тэрээһиҥҥэ бастакы, 1975 сыллаах выпускниктар саҕалаабыт үтүө үгэстэрин салҕаан Бөтүҥ орто оскуолатын V-с выпустара хачыал-ыскаамыйа бэлэх ууннулар.
Бурятияттан кэлэ сылдьар Мавра Гаврильевналыын кэпсэттибит: «Биһиги бэһис выпусктар 1979 сыллаахха Бөтүҥ орто оскуолатын 22 буолан бүтэрбиппит: 9 кыыс уонна 13 уол. Кылаас салайааччыта Поскачин Александр Семенович этэ. 10-с кылааһы эдэр физика учуутала Карамзин Анатолий Иванович бүтэртэрбитэ. Кылааспыт старостата Яковлев Вася. Биһиги кылаас оҕолоро олус көхтөөх кылаас этибит. Спортивнай күрэхтэһиилэргэ оройуоҥҥа, республикаҕа оскуолабыт чиэһин көмүскүүрбүт. Уолаттарбыт ЛТО-ҕа сайын аайы үлэлииллэрэ. ВИА-ҕа кытталлар этэ. Байыаннай-патриотическай оонньууга оройуоҥҥа1 миэстэ, өрөспүүбүлүкэҕэ 4 миэстэ буолбуппут. Ол онно военком Иван Иосифович Мохначевскай тахсан Маҥхааһайдаах алааһыгар автоматынан сыал ытарга бэлэмниирэ. Оскуола кэмигэр үөрэнэ сылдьан Москванан, Ленинградынан путевканан баран кэлбиппит. Куорсун-кынат анньан, олох киэҥ аартыгар үктэннэрбит оскуолабытыгар, учууталларбытыгар истиҥник махтанабыт».
Быйылгы 50-с сыллаах выпусктарга талан ылбыт идэлэригэр туттарсан киирэн, төрөөбүт нэһилиэктэригэр туһалаах дьон буолан улаатан-үүнэн тахсалларыгар баҕарабыт.
Мария Иванова.