Бүгүн, олунньу 23 күнүгэр Аммабыт улууһун киэн туттар киһитэ, түөрт Дьоруойдарыттан биирдэстэрэ, хорсун разведчик, буойун- учуутал Петр Ионович Яковлев күн сирин көрбүтэ. Быйыл биһиги улууспутугар Тыа хаһаайыстыбатын сылыгар кини төрөөбүтэ 105 сылын туолла. Үлэ Дьоруойа, буойун-учуутал олорбут олоҕо биһиэхэ күн бүгүҥҥэ диэри үтүө холобур буолар.
Петр Ионович Яковлев 1921 сыллаахха олунньу 23 күнүгэр Амма Наахара нэһилиэгин Дьыбадаах үрэҕин баһыгар дьадаҥы дьиэ кэргэҥҥэ төрөөбүтэ. 1939 сыллаахха Амма Наахара оскуолатын ситиһиилээхтик үөрэнэн бүтэрбитэ. Салгыы Дьокуускайдааҕы педагогическай техникумҥа үөрэнэ барбыта. Үөрэнэ сылдьан, Аҕа дойду улуу сэриитэ саҕаланан, 1941 сыл атырдьах ыйыгар Ийэ дойдутун немецкэй талабырдьыттартан көмүскүү барбыта.
Манна 235-с стрелковай дивизия 801-с стрелковай полкатын састаабыгар сылдьан, Ийэ дойдутун иһин хорсуннук сэриилэспитэ, разведчик этэ. 1943 сыл от ыйын 23 күнүгэр Орел куорат аннынааҕы кыргыһыыга атаҕар бааһыран, сэрии 3-с группалаах инбэлиитэ буолан, 1944 сыллаахха тохсунньуга төрөөбүт дойдутугар эргиллибитэ. Фронтан эргиллэн кэлэн баран, 1944 -1960 сылларга Амма Наахара 8 кылаастаах оскуолатыгар алын сүһүөх кылаас физкултуураҕа, ботаникаҕа учууталынан таһаарыылаахтык үлэлээбитэ. Петр Ионович учууталлыы сылдьан Валентина Гаганова бачыымынан фермаҕа биригэдьииринэн үлэлиир, онтон ыанньыксыттыыр.
Петр Ионович Яковлев биһиги оройуоммутугар ынахтан өлгөм үүтү ыаһыҥҥа олоҕун бүтүннүүтүн анаабыт, аан бастакынан ыччаты күүстээх үлэҕэ көҕүлээбит уонна уһуйбут, дойдутугар тапталы сүрэҕэр иҥэриммит патриот киһинэн буолар. Кини хас биирдии ынаҕыттан 5432 киилэ үүтү ыыры ситиспитэ. Мин эбэм, Устинова Мария Павловна Дьуонабыһы кытта тэҥҥэ үлэлээбитэ, биһиэхэ сиэннэригэр өрүү кэпсиир, саһарбыт хаартыскалары көрдөрөр. Өссө оскуолабыт түмэлигэр интэриэһинэй экспонаттар, матырыйааллар элбэхтэр. Социалистическай Үлэ Дьоруойа, үс Ленин уонна «Бочуот Знага» уордьаннар, ССРС аҕыс мэтээллэрин кавалердара, Саха АССР IV Ыҥырыылаах Үрдүкү Сэбиэтин депутата, өрөспүүбүлүкэ хас да төгүллээх чемпион ыанньыксыта, коммунист Петр Ионович быйыл үбүлүөйдээх сылын үөрүүлээхтик бэлиэтиибит. Кини олорбут олоҕо биһиэхэ, кэлэр кэнчээри ыччакка, үтүө холобур буолар.
Наина ЗЫКОВА, «Аартык» медиакиин эдкора