Болугурга сылын аайы олохтоох дьаһалта көҕүлээһининэн кыһыҥҥы мууһу хаһааныыга субуотунньук тэриллэн ыытыллар. Субуотунньукка тэрилтэлэр көхтөөх кыттыыны ылаллар.
Муус ылыытыгар баһаарынай чаас, коммунальнай хаһаайыстыба, оскуола, уһуйаан, култуура киинин кэлэктииптэрэ, ону сэргэ улахан кылаас үөрэнээччилэрэ таҕыстылар, үөрэ-көтө үлэлээтилэр. Муус тиэйэр тиэхиньикэлэри олохтоох дьаһалта хааччыйда. Манна барыта 145 лиитэрэ уматык барда. Субуотунньук кыттыылаахтара оскуола уонна уһуйаани повардара астаабыт итии мииннэрин, минньигэс бэрэскилэрин тото-хана аһаатылар, онтон олохтоох дьаһалта кыргыттара алаадьынан айах тутан, эбиэт тардан, аһатан муус ылааччыларбыт үлэлэрин өссө тэтимиртэ.
Муус дьиэлэригэр соҕотох олорор ытык кырдьаҕастарга , бэтэрээннэргэ уонна анал байыаннай дьайыы кыттыылаахтарын дьиэ кэргэттэригэр босхо көмө быһыытынан тириэрдилиннэ. Маннык үтүө санаа субуотунньугар кыттыбыт дьоммутугар махталбытын тириэрдэбит. Барыгытыгар чэгиэн туругу, дьон махтала үтүөнэн эргиллэн бары этэҥҥэ буолун.
Маргарита ВИКИТЯРОВА, Болугур нэһилиэгин баһылыгын солбуйааччы